UTASSCO, Fag Machine midaog
Nakabira og daog ang UTASSCO Utility dihang ilang gipukan ang Hero Commando Pistols sa iskor 80-75 sa ilang duwa niadtong miaging adlaw sa Power Forty President’s Cup 2008 Summer League basketball tournament didto sa Inayawan Sports Complex.
Sa sayo pa, ang Fag Machine mimasaker sa DJD Eng’g. sa iskor nga 105-78. Ang 27 puntos nga lubong maoy labing daku nga labaw sa kasamtangan ning upat ka semana na nga liga.
Ang UTASSCO mikatkat na sa ikaduha nga dapit sa ilang 2-1 win-loss record ug nagsunod sila sa way pildeng Christine Traders nga nagbitbit og 3-0 nga baraha.
Si Alex Mercado maoy nangu sa UTASSCO sa iyang 17 puntos, samtang si Peter Lalican miamot og 20 puntos.
Unom ka magduduwa sa Fag Machine maoy mihatag og dakung kadaot ngadto sa DJD Eng’g. ubos sa pagtimon nila ni Hermes Abasolo ug Boy Villoga nga pulos mirehistro og 16 puntos. Si Ramil Dadoy mitampo og 15 puntos, samtang si Mario Tabar miamot og 14 puntos.
Ang DJD Eng’ng. gipangulohan ni Tito Dimitiman sa iyang 18 puntos samtang laing upat niya ka kauban mi-iskor sab og double figures.
Ang second round sugdan karong Martes diin ang Christine mosuway og kulit sa ilang ikaupat nga daog batok sa defending champion Amihan Bag.
PUNTOS MATAG
Unang duwa:
Fag Machine (105) -- Abasolo 16, Villoga 16, Dadoy 15, Tabar 14, Fuentes 11, Ylaya 10, Mosqueda 8, Sabejon 6, Kalinga 5
DJD Eng’ng. (78) -- Dimitiman 18, Abadejos 15, Abasolo 15, Balbanera 15, Abatayo 10, Nuñez 8
Ikaduhang duwa:
UTASSCO (80) -- Mercado 17, Moniva 16, Nacional 16, Romariz 10, Labajo 6, Yu 5, Silote 2, Filosopo 2
Hero Commando (75) --Lalican 20, Rosal 12, Genzon 10, Rabadon 10, Ibones 9, Navares 6, Javierto 6, Nacional 2
- Latest
- Trending
