Boksingsa Mandaue

Makasaksi na sab ang Mandauehanons og laing kulbahinam nga boxing event nga giulohan og “Binumbahay sa Kinumo II” karong Sabado sa alas-7:00 sa gabii diha sa Mandaue Plaza Square.

Si light flyweight prospect Romart Sentillas sa RWS Gym  makigsabunot ni Roilo Golez sa Lazarito Stable sa Bukidnon sa main event sa maong promosyon nga gipasiugdahan sa Rex ‘Wakee’ Salud Promotions International.

Sa undercards, si  Tata Casimero sa Mandaue-Omega Gym moharong ni Jerome Bontog sa Philippine-Australia Gym based sa barangay Opao, Mandaue, samtang si Rodulfo Sumabong sa RWS Gym makigharong ni Henry Achas sa Bukidnon sa laing unom ka hugna nga binakbakay.

Sa laing bahin, si Ali Cali sa RWS Gym makigsinukliay og kumo batok ni Felix Mallorca sa Bukidnon, si Ed Earl Arellano sa Omega Gym makigsangka ni Edcel Tuñacao sa Philippine-Australia Gym ug si Octavio Aleonar sa Carcar City makigsinukliay og kumo ni Adonis Aguello sa Maasin City.

Sa preliminary bouts nga pulos gikatakda sa upat ka hugna, si Ryan Tampus sa RWS Gym-Cebu City moharong ni Mark Anthony Geraldo sa Bukidnon, samtang si Elf Getgano sa Omega Gym makigbangga ni Ariel Adan sa Philippine-Australia Gym.