Ang kakulian sa lawas makaapekto gayod sa career sa usa ka tawo. Usa sa pruyba niini mao ang nahitabo sa giyukboang The Magician nga si Efren 'Bata' Reyes.
Napakyas ang Pinoy pool maestro nga si Reyes sa pagpabilin isip top money-maker sa world of pool sa tuig 2007 gumikan sa pagsugmat sa dugay na niyang giantos nga sakit nga arthritis.
Tungod sa arthritis, napakyas si Reyes pagsalmot sa ubay-ubay nga mga torneyo sa gawas sa nasud. Tungod sab sa maong sakit, mora'g dili 100% ang iyang performance sa mga torneyo nga iyang naapilan maong dili kaayo siya daku'g kita karong tuiga.
Ang 53-anyos nga si Reyes, kinsa giila nga greatest billiard player of all time, maoy numero uno sa money list sulod sa tulo ka sunod-sunod nga katuigan (2004, 2005 ug 2006). Niadtong tuig 2007, miambak siya gikan sa top spot tungod sa arthritis.
'Umatake na naman'yung arthritist ko, 'yun ang malaking dahilan kaya bihira tayo na manalo sa taong ito." nagkanayon si Reyes, ang prize fighter sa Puyat Sports nga nag-ingon nga kini sab ang ikatulong higayon sa iyang pro billiards career nga diyutay lang ang nadag-an niyang mga torneyo.
"Noong 1997 at 1998, hindi rin ako nanalo dahil nga sa arthritis," midugang pagpasabot si Reyes kinsa mibolsa sa paycheck sa world pool nga $500,000 gumikan sa iyang paghari sa International Pool Tour (IPT) World 8-Ball sa Nevada, USA niadtong tuig 2006.
"Isa pang dahilan, bihira akong makasali sa ibang bansa sa taong ito lalo na sa Amerika kasi mataas ang tax," matud pa ni Reyes.
Gikan sa number one spot niadtong 2004, 2005 ug 2006, sa tuig 2007 nahulog si Reyes ngadto sa ika-13 nga dapit sa Azbilliards money list. Ang premyo nga iyang nahipos mikabat lang sa $54,355.
Si Daryl Peach sa England nga maoy kampiyon sa 2007 Philippine World Tour maoy nakapuwesto sa unang dapit sa money list tungod sa iyang $103,000 total earning sa tulo ka torneyo nga iyang giharian.
* * *
(Mga sugyot ug pakisayod? Text sa 0910-8105522)