Golden Lines, Ave Maria mikulit og daog
Gilisud-lisod pa ang Golden Lines Shipping ug Ave Maria una nila maangkon ang kadaugan batok sa ilang managlahing kaatbang sa opening games sa 2008 Vic Enterprises Invitational Cup basketball tournament niadtong Domingo didto sa CEC gym.
Ang Golden Lines Shipping naka-eskala og daog batok sa Cyber Rasta, 80-78, samtang ang Ave Maria mipaluhod sa Unilink Shipping sa iskor nga 80-74.
Sa tulo ka duwa niadtong Domingo, bugtong ang DMP-Mitsubishi ang nakabiya og daku batok sa Roble Shipping, 78-69.
Ang kanhi commercial player nga si Aristotle Jayme mirehistro og 24 puntos aron pangulohan ang Golden Lines ni commissioner George Uy, samtang si Alex Armenion mitampo og 14 puntos.
Ang Cyber Rasta gipangulohan ni Rocky Bacalso kinsa mikamada og 18 puntos gisundan ni Ryan Velos sa iyang 15 puntos.
Sa laing bahin, wala kalahutay ang Unilink Shipping bisan pa’g tulo sa ilang mga pambato mihakot og double figures pinangulohan ni Martin Grogaard sa iyang 25 puntos. (Gabby G. Malagar)
- Latest
- Trending
