Rockets Nahagsa

Nahagtos ang 22 ka sunod-sunod nga daog sa Houston Rockets human kini gilubong og 20 puntos sa National Basketball Association (NBA) leader Boston Celtics, 94-74 sa ilang engkuwentro kagahapon didto sa Toyota Center sa Houston, Texas.

Naharos sab sa Boston ang duha nila ka duwa batok sa Houston human usab kini nila mabiktima, 97-93 niadtong Enero 2  didto sa Banknorth Garden sa Boston, Massachusetts.

Ang maong kapildihan nakabaraw sa tinguha sa Rockets kinsa mosuway unta og kulit sa ilang ika-23 nga sagunson nga daog. Mao sab kadto ang una pagkahagsa sa Rockets sukad kini napilde sa Utah Jazz, 89-97 niadtong Enero 27.

Bisa’g wala moduwa si Ray Allen, ang Celtics nakahimo gihapon sa paglubong sa   Rockets pinaagi sa pagtimon nilang Kevin Garnett, Paul Pierce ug Leon Powe.

Si Allen mipabuto og 22 puntos uban ang 11 ka rebounds, si Powe mitampo og 21 puntos, samtang si  Pierce mitampo og 20 puntos alang sa Boston nga nagtangag og 54-13 win-loss record.

Ang Houston nga natupngan na sa Los Angeles Lakers sa 46-21 nga baraha, gipangulohan ni Luis Scola kinsa mimaneobra og 15 puntos. Sila si Mike Harris ug Rafer Alston  mitampo og 12  puntos matag usa ug si Aaron Brooks miamot og 10 puntos.

Ang 22 ka sunod-sunod nga daog sa Houston ikaduha lang nga labing taas sa kasaysayan sa NBA ubos og 11 ka daog sa nakab-ot sa 1971-1972 season sa Lakers nga adunay 33 winning streak.

Sa laing mga duwa, ang LA Lakers midaog sa Dallas Mavericks, 102-100, ang Miami Heat nakatagamtam na sab og laing daog pinaagi sa pagbuntog sa Milwaukee Bucks, 112-106, ang Detroit Pistons milampos sab pagpukan sa Denver Nuggets, 136-120.

Midaro og daog ang Chicago Bulls human gisungag ang New Jersey Nets, 112-96,  ang Sacramento Kings mipaluhod sa Golden State Warriors sa iskor nga 122-105, samtang ang Phoenix Suns mipakaging sa Portland Trailblazers sa iskor nga 111-98.