Lapu-Lapu Chief nakauna sa serye
Nangita pa og problema ang Lapu-Lapu City Chiefs dihang ilang giusikan ang ilang 13 puntos nga labaw apan dali kining nakabawi aron ilang masanta ang pagbahis sa Bogo City Bogoys pinaagi sa pag-iskor og 86-82 nga kadaugan sa Game- 1 ug usa na lang ka daog aron ilang maangkon ang makasaysayanon nga korona sa 1st Inter-City Challenge Cup basketball tournament didto sa nagsugwak nga Lapu-Lapu Plaza covered court.
Ang Chiefs nagtinguhang moharos sa "best-of-three" final series batok sa Bogoys sa Game-2 nga padayon pang nagkumbati sa pagsulat niini kagabii didto sa Don Celestino Martinez Sr. Memorial Coliseum. Kun ugaling adunay Game-3, mobalik ang duwa didto sa kampo sa Chiefs karong gabii.
"Among chance sa Bogo 50-50 kay dili sab sila ka-kompyansa-an. Ang amo
ra gyung dag-anan homecourt advantage tungod sa suporta sa mga tawo," matud pa ni coach Larry Villanil.
Nagkaguliyang sa makadali ang Chiefs dihang ang ilang 13 puntos nga labaw gikalingawan og papas sa Bogoys aron pag-ilog sa labaw, 82-81 human sa 3-pointer ni Jun Ace Ursal sa katapusang 55 segundos sa duwa.
Apan daling nailog og balik sa Chiefs ang labaw, 83-81 human sa tira ni Adonis Morata. Ang Chiefs mipatuman og hugot nga depensa nga maoy nakaguba sa duwa sa Bogoys.
Si Jarjar Degamo maoy nangu sa Chiefs sa iyang 21 puntos lakip na niini ang upat ka triples. Si Morata mitampo og 16 puntos, si Michael Asoro mitampo og 12 puntos, samtang si Orly Amores miamot og 10 puntos.
Si Ursal mao usab ang nangulo sa pilderong Bogoys, gisundan ni Noel Balili nga adunay 16 puntos. Si Art Pelayo miamot og 15 puntos ug si Atan Casinillo mibugha og 12 puntos.
Puntos MATAG
Lapu-lapu (86) --Degamo 21, Morata 16, Asoro 12, Amores 10, Berido 9, Dalumpines 7, Falcon 5, Soroño 4, Pancho 1, Amistad 1
Bogo (82) -- Ursal 27, Balili 16, Pelayo 15, Casinillo 12, Pedroza 5, Seno 4, Valenzuela 2, Asingua 1
- Latest
- Trending
