Bogo vs. Lapu-Lapu sa Inter-city finals

Gitiwasan sa Bogo Bogoys ang karibal  niining Talisay Aquastars pinaagi sa pagpukan sa iskor nga  95-81  Game-2  aron pag-abante ngadto sa finals sa 1st Inter-City Challenge Cup basketball tournament niadtong miaging gabii didto sa Talisay Sports Complex.

Gumikan niini, ang Bogoys ni coach Hermes Sumalinog maoy moharong sa Lapu-Lapu Chiefs  ni  coach Larry Villanil alang sa “best-of-three” title showdown karong Biyernes   sa Lapu-Lapu City. Gitapos sa Bogo ang  serye sa 2-0.

Pagsugod pa lang, nagyagaw na ang Aquastars kay human sa ilang 6-0, igo lang sila nga gipa-iskor og siyete puntos kay naghuramentado ang Bogoys kinsa yano kaayong mikulit og 30 puntos aron tapuson ang unang hugna, 30-13.

Nasuwertihan sab ang Bogoys kay nagsige kini og pabuhagay sa ilang opensa sa hapit tanang anggulo hinungdan wala gyud makatangtang sa gapos ang Aquastars.

Nakaginhawa og gamay ang Talisaynons dihang kalit nga mipakita’g gilas sila si Raymond Tabar, Alejandro Cabañero ug Alfie Cabañero apan wala kini makasikit og maayo.

Ang “best-of-three” pagahimuon sa tulo ka sunod-sunod nga mga adlaw. Ang Lapu-Lapu City maoy unang mo-host ug Game-2 adto duwaon sa Bogo. Kun adunay Game-3 ang serye ibalik sa nataran sa Lapu-Lapu City.

Si Jun Ace Ursal maoy nangulo sa Bogo sa iyang 25 puntos, gisundan ni Noel Balili nga adunay 21 puntos.

Si Alejandro Cabañero mao usab ang nangu sa Talisay sa iyang 28 puntos, si Tabar mitampo og 15 puntos, si Alfie Cabañero miamot og 12 puntos ug si Jordan Bardillas mipuno og 10 puntos.

Ang Talisay ni coach Jurie Violango makigsangka batok sa Danao City Pistols alang sa ikatulong dapit.

PUNTOS MATAG USA

Bogo (95) -- Ursal 25, Balili 21, Valenzuela 14, Pedroza 8, Tudtud 7, Pelayo 6, Seno 6, Asingua 3, Casinillo 3, Labaco 2

Talisay (81) -- A. Cabañero 28, Tabar 15, Al Cabañero 12, Bardillas 10, Seguerra 9, Iglamo 7, Echavez 1