Bambi Cooking Oil, SRBC, Yayoy's Grill midaog

Ang Bambi Cooking Oil ug San  Remigio Beach Club (SRBC) mikandos sa ilang ikaduhang sunod-sunod nga kadaugan, samtang ang Yayoy's Grill mikulit sa ilang unang daog sa 2008 K Gallery First Conference basketball tournament didto sa Visayan Glass Gym, sa barangay Guadalupe, ning siyudad.

Ang Bambi Cooking Oil milampurnas sa Diakon sa iskor nga 78-64, samtang ang SRBC nagkinahanglan pa og dugang singko minutos una nila maangkon ang 99-90 nga kadaugan batok sa Kidneycare.

Ang SRBC milabaw og nuybe puntos human sa unang kuwarter sa iskor nga 23-14, apan ang Kidneycare  milusad og makabungog nga  28-10 run sa ikaduhang kuwarter aron pagpapas sa labaw  ug ingon man pagbaton og nuybe puntos nga bentaha, 42-33 paghuman sa maong kuwarter.

Mipahimulos og singko puntos nga labaw ang Kidneycare, 63-58 sa third quarter,  apan ang nagluya nga SRBC mibalik og kalagsik sa katapusan ug final quarter aron pagtabla sa iskor, 85-all nga naghatod sa duwa ngadto sa overtime.

Sa dugang singko minutos, ang SRBC mao na ang midominar sa duwa aron pag-angkon sa kadaugan.

Sa laing bahin, ang Yayoy's Grill nakabawi sa ilang kapildihan sa opening game dihang ilang gipahungawan sa ilang kalagot ang El Deneyroe sa iskor nga 64-53.