Banhawon og balik sa kagamhanan sa dakbayan sa Mandaue pinaagi ni Mayor Jonas Cortes ang Mandaue City Sports Commission (MCSC) ug ang tahasan nga modumala niini mao si Atty. Omar Redula, ang kanhi deputy commissioner sa Cebu Amateur Athletic Association (CAAA).
Matud pa ni Redula nga nakahan-ay na siya og pipila ka mga kalihukan nga tentatibo karong Marso 15 nga usa sa mga highlights sa selebrasyon sa kapistahan sa Mandaue karong Mayo 8.
Ang kick-off activity mao ang boxing card nga gilangkuban og upat ka professional bouts ug 14 ka amateur fights diha sa Mandaue City Plaza Square.
Mao kini ang gipahibalo ni Redula atol sa senemanang SCOOP Forum kagahapon didto sa Baseline Restaurant.
Uban ni Redula mao si Oscar Quirante, ang kanhi ring physician ug boxing judge.
Mitambong sab sa SCOOP Forum mao ang mga sakop sa PRISAA-7 taekwondo champion team nga naglakip nilang Hazelyn Yusoa, Aprilyn Salo ug Karen Fontanilla. Uban pang mga dinapit mao sila si taekwondo coaches Edelberto Banzon ug George Rodriguez, Junilyn Dublin, Lovely Rose Lim ug Gerald Paglinawan ug basketball coaches Camilo Go sa University of Southern Philippines Foundation ug Galimar Largo sa USC-North nga naghisgot kalabot sa kalihukan sa Cherifer Tangkad Sagad 12-Under basketball tournament nga buksan ugma diha sa Don Bosco covered courts.