Boycott nabaraw

Nabaraw ang unang gilaraw sa uban nga mga host teams nga mo-boycott sa National Students Basketball Championship (NSBC) nga gipahigayon dinhi sa dakbayan sa Sugbu ug sa lungsod sa Minglanilla.

Kini human si kanhi kongresista Prospero 'Butch' Pichay sa Surigao City mihangyo ngadto sa mga tag-iya ug mga presidente sa mga tunghaan sa pagsalmot sa maong liga.

Matud pa ni Pichay ngadto ni NSBC organizer Lorenzo 'Chao' Sy nga nalipay kaayo siya nga nausab ang huna-huna sa administrasyon sa University of San Carlos (USC), Southwestern University (SWU) ug sa Asian College of Technology (ACT) nga ilang gitugotan ang ilang tagsa-tagsa ka koponan sa kolehiyo pagsalmot sa usa ka semana nga kompetisyon.

Gawas lang sa University of the Visayas (UV) Green Lancers nga hugtanong misupak sa mando gikan sa BAP-SBP sa Manila sa dili pagsalmot.

Sa miaging adlaw, wala motunga sa Cebu Coliseum ang nahisgutang tulo ka teams, apan sa wala pa mosawop ang adlaw mipahibalo ang maong  teams nga mosalmot sa torneyo.

Masuk-anon kaayo si Pichay nga mibatbat mahitungod sa boycott kay matud pa niya nga ang paghimo’g boycott nagpasabot nga "anti-sports."

"Don't mess with me. Let's put an end to this politics in sports," matud pa ni Pichay ngadto sa Cebuano teams.

Sa kalit nga pagbalitok sa tulo ka host teams, nagpasabot kini nga magmalampuson ang torneyo dinhi sa Sugbu.