Camaso gibira sa M. Lhuillier

Gisal-ot ni M. Lhuillier Kwarta Padala coach Raul 'Yayoy'  D. Alcoseba sa iyang lineup si kanhi PBA star Don Camaso sa tinguha nga kahatagan og maayong kumbati ang Talk ‘N Txt Phone Pals sa ilang exhibition game nga gikatakda ugma sa alas-7:00 diha sa Cebu Coliseum.

"Lig-on kaayo na nga team ang Talk ‘N Text so kinahanglan nga palig-onon nato ang atong lineup aron makahatag ta og maayo ug makalingaw nga away," matud pa ni Alcoseba. "Akong gi-awhag ang mga Sugbuanon nga mahilig og basketbol pagtan-aw sa duwa kay seguradong sulit gyud ang ilang bayad."

Si Camaso katapusang miduwa sa PBA uban sa Red Bull. Usa na siya karon nga free agent gumikan kay wala man lugwayi ang iyang kontrata sa Red Bull management.

Adunay abilidad si Camaso ug way duda nga daku kini og ikatampo sa puwersa sa M. Lhuillier. Gawas nga abtik ug tirador sa perimeter, si Camaso dili sab kini mahadlok molusot.  Usa siya ka small forward, apan epektibo sab kun paduwaon sa off-guard position.

Sa ilang duwa, ang Phone Pals maoy inilog apan dili sila angayan nga mokompiyansa gumikan kay sagad sa mga batos sa M. Lhuillier nakaduwa sab sa PBA.

Gawas ni Camaso, ang ubang mga pambato sa M. Lhuillier nga nakaladlad sa ilang abilidad sa pro league mao sila si Stephen Padilla, Ron Capati, Leo Bat-og, Bruce Dacia, Danny Aying, Dale Singson ug Marlon Basco.

Mohatag og dugang suporta kanila mao sila si Woodrow Enriquez, Gerry Cavan, Enrico Llanto ug Jayford Rodriguez.

Sa habig sa Phone Pals, si coach Chot Reyes moparada nilang Felix Belano Jr., Jimmy Alapag, Mark Cardona, Kalani Ferreria, Ren-Ren Ritualo, Patrick Fran, Ernesto Billones, Harvey Carey, Jay Washington, Yousif Aljamal, Yancy de Ocampo, Don Allado, Ali Peek ug Migs Noble.

Ang mga tiket nagkantidad lamang og P20 sa general admission, P50 sa upper box, P100 sa lower box ug P200 sa ringside.