Kidney Care, San Remigio Beach Club, Yayoy's Grill midaog sa 2008 Gallery basketball league

Milansang og daog ang Kidney Care, San Remigio Beach Club ug Yayoy’s Grill sa pagsugod sa 2008 K Gallery Basketball League First Conference niadtong Domingo didto sa Visayan Glass Gym sa barangay Guadalupe, ning siyudad.

Ang Kidney Care milubong sa El Dyniroe Convenience Store sa iskor nga 85-61, gilubong sab sa San Remigio Beach Club ang USC Law sa iskor nga 93-56, samtang ang Yayoy’s Grill  midaog sa Hayden sa iskor nga 56-51.

Katorse ka teams nga gibahin ngadto sa duha ka brackets  ang mag-ilog sa korona sa  maong torneyo nga gipaluyohan sa Alberto’s Pizza, Atty. Jeffrey Pabriaga, Signa Modena ug Robert Rafson Chua sa Bambi Cooking Oil.

Lain pang koponan nga mi-apil mao ang Diakon, Atan Guardo-Sherilin, Sam’s Moondogs, Daks Kakanin Korner Don Alejandro’s,  Baisa Security Agency, Bambi Cooking Oil ug VL Enterprise.

Ang duha ka buwan nga torneyo mosubay og single round robin format diin ang top two teams sa matag bracket moabante sa crossover semis.

Ang mga winners magsangka sa tinaktakay nga kampiyonato.

Gawas sa mga tropeyo, ang kampiyon mobulsa sab og P12,000, samtang ang runner-up modawat og P5,000. Ang MVP hatagan og P500.