Gipakita ni Jovie Saulog, ang kanhi hari sa motocross sa nasud nga aduna pa siya’y ikabuga pinaagi sa pagdominar sa second leg sa 2008 MS Motosuit Motocross Series nga giulohan og “Mayor German P. Serana 2nd Bayawan Petron Sprint 4T Outdoor Challenge” niadtong Domingo didto sa Cabcabon Hills sa Bayawan City, Negros Oriental.
Gipabuhagay ni Saulog ang tanan niyang kusog ug kasinatian aron molampos sa lapukon nga racetrack uban sa iyang karibal nga si Irwin Ramas-Uypitching.
Sama sa miaging tuig, si Uypitching mitapos sa ikaduha nga dapit ug gisundan sa Sugbuanong si Pepo Rubi alang sa ikatulo.
Usa sa nakapahimo ni Saulog paghari sa kompetisyon mao ang mando ni event organizer Lou Ornopia nga pamub-an ang lumba ngadto na lang sa usa ka heat ug tulo ka laps sa experts division tungod sa dili kaayo haum ang racetrack.
Sa laing bahin, sila si Donkey Sanchez ug Dexter Bacabac milangkat og duha ka titulo matag usa.
Gidominar ni Sanchez ang local enduro batok nilang Bonnie Bustillo ug Martin Nuñez. Nag-una sab siya sa novice enduro pinaagi sa pagpukan ni Christopher nilang Voss ug Bustillo nga mipahiluna sa ikaduha ug ikatulo nga dapit.
Si Bacabac naghari sab sa novice production ug executives A. Iyang gipukan silang Tadoy Mercado ug Rex Barbaso sa novice class ug iya sab nga napanalipdan ang iyang korona sa executives A pinaagi sa pagpukan nilang Nonoy Reluya ug Jun Enriquez.
Sa executives B, si Bryan Tuason mao sab ang naghari human niya gipilde sila si Seigfred Ornopia ug Jet-Jet Oliveros, samtang sa executives C, si Glenn Concha mao ang nanghawod, gisundan nilang Bobby Minorias ug Felipe Montejo nga mi-okupar sa ikaduha ug ikatulo nga dapit.