Howard maoy slam dunk king, kapono kampeyon sa 3-pts

Ang 6-11 nga si Dwight Howard sa Orlando Magic naglutaw sa kapunawpunawan nga mura’g langgam, mura’g eroplano ug mura’g si Superman. Sa kinatibuk-an, siya maoy bag-ong kampeyon sa Slam Dunk ug mipalagpot sa defending champion nga si Gerald Green sa Minnesota Timberwolves.

Nagsul-ob og puwa nga kapa, ang panel of judges o mga maghuhukom mihatag kang Howard ug perfect 50’s sa talagsaon niyang gipakita nga slam dunk nga nagbaraw sa karaang panultihon ngadto na sa gi-ingon nga “Big men can fly”.

Mihugyaw ang katawhan lakip na ang mga maghuhukom sulod sa New Orleans Arena didto sa Louisiana nga sila si Magic Johnson, Karl Malone ug mga sikat nga dunkers nga sila si Dominique Wilkins, Julius Erving ug Darryl Dawkins ug silang tanan mihatag ug Perfect 10’s ni Howard.

Ang ubang mga misalmot migamit og props ug ingon man ilang mga kauban sa team. Si Howard migamit kang Jameer Nelson isip iyang prop sa maong kompetisyon.

Matud pa ang gihimong dunk ni Howard nga naglupad gikan sa may foul line wala mahimo nilang Michael Jordan, Kobe Bryant, Vince Carter ug Spud Webb. ”It’s really for big men. Everybody always says, big men can’t jump and big men don’t look good dunking. I just tried to add a little bit of my personality. With me being so tall, I knew it was going to be tough. I tried to play to the crowd and have fun,”  matud pa ni Howard.

Ang ubang misalmot sa Slam Dunk contest mao sila si Jamario Moon ug si Rashad McCants sa Toronto ug Rudy Gay sa Memphis.

Sa laing bahin, si Jason Kapono sa Tornto Raptors nagpabiling kampeyon sa 3-point shootout nga kanhi iyang gihuptan .

Si Kapono mi-iskor ug 25 puntos sa final round ug iyang napasulod ang tanang money balls nga may tugbang dos puntos. Human sa sangka, si Kapono migakos sa iyang kauban sa team nga si Chris Bosh.

Ang 25 puntos nga nakuha ni Kapono mitabla sa record nga nahimo ni Craig Hodges kaniadtong 1996. Si Kapono mibuntog kanilang Daniel Gibson sa Cleveland nga may 17 puntos ug ingon man kanila ni Dirk Nowitzki sa Dallas, Richard Hamiton sa Detroit Pistons, Steve Nash sa Phoenix Suns  ug ni Peja Stojakovic sa host New Orleans. Sa laing bahin, si Deron Williams sa Utah Jazz maoy midaug sa Skill Challenge dihang iyang gilibot ang korte sa New Orleans Arena sulod lang sa 25.5 segundos ug iyang gipukan si Chris Paul sa New Orleans kinsa may 29.9 segundos. Ang oras nga nakuha ni Williams bag-ong record sa unom na ka tuig nga sangka.

Sa Shooting Star nga usa ka bag-ong pakulo sa All-Star nga naglangkub og duha ka NBA players ug usa ka WNBA player, midaug ang San Antonio Spurs ubos nilang David Robinson, Tim Duncan ug Becky Hammon.