Mosikad na ang 2nd leg
Ang second leg sa 2008 MS Motosuit Motocross Series nga ulohan og "Mayor German P. Serana 2nd Bayawan Petron Sprint 4T Outdoor Challenge" mosikad karong buntag didto sa Cabcabon Hills sa Bayawan City, Negros Oriental.
Dili modepensa sa iyang pro title si Glenn Aguilar ug ingon man si Irwin Ramas-Uypitching sa experts class, apan makalingaw gihapon kini sa mga katawhan sa Bayawan gumikan kay si Jovie Saulog, ang hari kanhi sa racetrack mopakita man sa iyang aksiyon.
Gawas ni Saulog, ang top daredevil sa Sugbu nga si Pepo Rubi, 2007 MS Motosuit "Rider of the Year" awardee Juvanni Abellar ug iyang igsuon nga si Juvenile ang mopakita sab sa ilang abilidad sa motocross.
Sila si Bonnie Bustillo, Rex Barabaso, Clark Wagas, Dexter Bacabac, Nonoy Reluya ug Jacky Cortes nga misalmot sa Bayawan race sa miaging tuig modepensa sab sa ilang tagsa-tagsa ka titulo.
Ang Bayawan leg gipresentar sa MS Motosuit ni sports patron Lou Ornopia uban sa abag sa lokal nga kagamhanan sa Bayawan, Imarflex Evvo Motorcycle Battery, MS Digital Prints, 888 HeaderCore Muffler Tech, Cebu Progress Marketing, Reliance Motor Sales, MS Carsuits, Keiz BZ Motor Sales ug NC Racing.
- Latest
- Trending
