5th Thirsty Football Fest mosikad na diha sa CCSC

Miabot sa 228 ka teams ang mopakita'g aksiyon sa 5th Thirsty Football Festival nga mosikad karong hapon diha sa Cebu  City Sports Center (CCSC).

Ang tulo ka adlaw nga kompetisyon maoy labing daku gawas sa Metro Manila nga adunay kapin sa usa ka gatos nga entrante ning tuiga itande sa miaging tuig.

Sa initial report,  adunay 230 ka partisipanteng koponan ang natala, apan ang duha wala moapil tungod sa pinansiyal nga kakulian, matud pa ni Charlie Pages, kinsa maoy nagpaluyo sa maong football festival atol sa press conference kagahapon didto sa Moon Cafe.

Matud pa usab ni Pages nga ilang gibalibaran ang ubang late entries tungod kay nakakompleto na ang iskedyul.

Mga bisitang koponan naggikan sa Tanjay, Dumaguete, Tacloban, Maasin, Masbate, Cagayan de Oro, Davao, Bacolod, San Carlos City, Ormoc ug Iligan. Makigtigi kini sa mga koponan gikan sa nagkalain-laing tunghaan ug lokal nga kahugpongan sa Sugbu.

Ang mga partisipante  gibahig ngadto sa 14 ka dibisyon nga naglakip sa Players 6, 8 ug 10, boys and girls’ 12, 14, 19, boys’ 17, men’s open, ladies open, 36-above ug 40-above class.

Gikatakdang moduwa karon mao ang Players 8, 10, boys 12, girls 14, boys 17, men's open ug 40-above. (Yoyo R. Abayan)