8 ka pilde sa Knicks naputol

Giputol sa New York Knicks ang ilang walo ka nagkutay nga kapildehan human nila pakurati ang Milwaukee Bucks sa iskor, 99-98 didto sa ilang korte sa usa ka kulbahinam nga sangka sa 2007-2008 NBA season kagahapon didto sa Bradley Center sa Milwaukee, Wisconsin.

Naglukdo si Jamal Crawford sa iyang kamot dayong dagan gawas sa korte human madungog ang buzzer ug misipyat ang Bucks sa kataposan nilang tira tungod sa ilang talagsaon nga kadaugan nga naghatag kanila ug 15-36 nga baraha.

Si Crawford ug Malik Rose maoy nakasalbar sa Knicks aron putlon ang ilang dimalas nga walo ka pilde diin kataposan silang midaug kaniadto pang Enero 25 dihang ilang gipilde ang Philadelphia Sixers.

“It almost felt like we won a championship”. Matud pa ni Crawford kinsa midugang pagbutyag “we need this win to break the cycle”.

Si Crawford mitabla sa duwa, 93-all may 3:45 pa ang nahibIling oras ug dayon si Rose maoy mihatag sa labaw ngadto sa Knicks, 97-96 may 2:35 pa ang oras.

Pagbalik sa opensa ngadto sa Bucks, gitawagan si Andrew Bogut ug offensive foul ug mipasulod na sab si Rose ug laing itsa, may 1:50 pa ang nahibiling oras aron paghatag  Og tres puntos nga labaw, 99-98.  Na-ilog ni Charlie Bell ang bola dayon pasulod sa iyang lay-up aron pagsikit Og usab, 98-99. Human sa timeout, si Bobby Simmons sa Milwaukee mihanag sa bola ngadto kang Bell kinsa mihaha ug drive dayong pasa ngadto kang Michael Ruffin apan ang iyang itsa wala gani mosabod ug ring ug hilabihan usab lipaya sa Knicks ilabi na ni Crawford nga maoy nangu sa ilang team sa iyang 30 puntos.

Ang Knicks nabiyaan ug 17 puntos sa sayong bahin sa third period apan hinay-hinay nga nakabangon tungod nila ni Crawford ug Rose lakip sab nilang Fred Jones nga may 18 puntos ug ni David Lee nga may 17 puntos.

Ang Bucks nga aduna nay 19-32 nga baraha, gipangulohan ni Charlie Villanueva sa iyang 21 puntos.

Sa laing duwa, naka-ipsot ang Golden State batok Sacramento, 105-102, midaug sab ang Utah batok Chicago, 97-87, gipiangan sa Houston ang Atlanta Hawks, 108-89, daug ang Philadelphia batok LA Clippers, 101-80, daug ang Indiana batok Portland, 101-93 ug gilatos sa New Orleans ang Memphis, 112-99 nga ganado na kaayo aron mo-host sa NBA All-Star Game unya sunod Domingo.