Duha ka duwa sa Western Conference ang gidesidihan pinaagi sa overtime diin ang New Orleans Hornets ug Utah Jazz midaog batok sa ilang mga ka-atbang sa nagpadayong duwa sa 2007-2008 season sa National Basketball Association kagahapon.
Ang Hornets mipukan sa nagkainit nga Phoenix Suns sa iskor nga 132-130 sud sa duha ka overtime, samtang nag-agi usab og overtime ang Jazz una nila maangkon ang 118-115 nga kadaugan batok sa Denver Nuggets.
Bisan pa man sa ilang kapildihan, ang Suns mao gihapon nagkupot sa liderato sa Western Conference ug sila sab ang nag-una sa Southwest Division sa ilang 34-15 win-loss record. Ang Hornets nga mipukan kanila nahimutang lang sa ikaduha sa ilang 33-15 win-loss record.
Si Chris Paul miratsada og 42 puntos, si Peja Stojakovic mitampo man og 26 puntos ug si Jannero Pargo mikulit og 22 puntos alang sa maong kadaugan.
Ang pilderong Suns gipangulohan ni Steve Nash, kinsa mihakot og 32 puntos, gisundan ni Amare Stoudamire nga miarangkada og 26 puntos ug milangkat og 20 ka rebounds.
Sila si Boris Diaw ug Leandro Barbosa mipabuto og 22 puntos matag usa sa maong kaparotan.
Sa laing bahin, si Pau Gasol kinsa mipupo og 24 puntos uban ang 12 ka rebounds sa labing una niyang duwa uban sa Los Angeles Lakers kalit lang nga mibahar hinungdan nga nadagit sa Atlanta Hawks ang 98-95 nga kadaugan.
Si Gasol igo lang mipupo og 12 puntos ug katunga sa iyang nakuha sa iyang unang duwa niadtong miaging adlaw.
Wala sab maka-arte ang superstar sa Lakers nga si Kobe Bryant kay igo lang sab kini miligwat og 11 puntos.
Si Joe Johnson miwadwad og maayo aron pangulohan ang Hawks sa iyang 28 puntos lakip na ang upat niya ka free throws sa katapusang 23 segundos.
Sa laing mga duwa, ang
Seattle Supersonics mipaluhod sa Sacramento Kings sa iskor nga 105-92, gilubong sa Orlando Magic ang gilamat nga New Jersey Nets sa iskor nga 100-84, ang San Antonio Spurs mikulating sa Washington Wizards sa iskor nga 85-77.
Gipukan sab sa Indiana Pacers ang kaatbang niining New York Knicks sa iskor nga 103-100, ang Detroit Pistons mipukan sa Miami Heat sa iskor nga 100-95, ang Boston Celtics mimakmak sa Los Angeles Clippers sa iskor nga 111-100.
Midaog sab ang Dallas Mavericks batok sa Milwaukee Bucks sa iskor nga 107-96 ug ang Portland Trailblazers miihaw sa Chicago Bulls sa iskor nga 100-97.