Unang nakaantog og daog ang USJ-R/Bibbo Hotdog human nila gipukan ang UC/Aspac Bank sa Game-1 sa ilang "best-of-three" championship series sa CESAFI Reinforced Partner's Cup sa iskor nga 109-101 niadtong Martes sa gabii didto sa Cebu Coliseum.
Daw gisakyan og debuwenas ang USJ-R/Bibbo Hotdog kay dihang mi-aksiyon na unta og gukod ang UC/Aspac Bank, mibundak kini og walo ka triples sa second half.
Ang USJ-R/Bibbo Hotdog nagtinguha nga modaog ugma sa Game-2 aron masakmit ang ilang ikaduhang sunod-sunod nga korona sud sa duha ka semana.
Apan ang UC/Aspac Bank naglaraw sab pagpukan sa USJ-R/Bibbo Hotdog nga gipangulohan sa beteranong si Luther Luke Justiniani.
Si Justiniani, kinsa milansang og 24 puntos mao na sab ang bida sa kadaugan dihang miposa kini og upat ka triples lakip na ang tulo sa ikaupat nga kuwarter maoy nakabugnaw sa duwa sa UC/Aspac Bank.
Ang USJ-R milabaw, 67-51 sa ikatulong kuwarter apan ang UC ubos sa pagpangulo ni Jared Kane Abatayo milusad og 21-8 hinungdan nga nahilis ang labaw, 75-73 ug nakatabla pa kini, 75-all pagsugod sa fourth quarter. Dali ra sab hinuon nakabawi ang USJ-R human sa duha ka interceptions ni Armand Ponce, 79-75 ug gikan niadto wala na nila hatagi’g laing higayon nga makasikit pa ang UC.
Si Fajardo kinsa na-fouled out, maoy nangu sa pilderong UC/Aspac Bank sa iyang 37 puntos, giabagan sab kini nilang Allain Abellanosa ug Abatayo nga pulos mi-antog og 14 puntos.
Ang maong kadaugan maoy ikatulo alang sa USJ-R/Bibbo Hotdog batok sa UC/Aspac Bank karon nga season sa Reinforced Partner's Cup ug pabiling walay pilde sukad masugdi ang liga niadtong Disyembre sa miaging tuig.
Sa laing bahin, nagpanikad na sab ang DBTC/Unilab-Alaxan nga mosakmit sa ikatulong puwesto batok sa CIT/Metro Gaisano nga ilang gipilde sa miaging adlaw, 74-71 niadtong Martes sa gabii.
Puntos Matag Usa
USJ-R/Bibbo Hotdog (109) -- Justiniani 24, Gudez 24, Delfino 14, Ponce 9, Hatague 9, Gabas 8, Villahermosa 8, Bibera 4, Malinao 2, Pateño
UC/Aspac Bank (101) -- Fajardo 37, Abatayo 14, Abellanosa 14, Canceran 10, Abella 7, Ducay 6, Juliane 5, Espinoza 2, Agas 2