Wala pa gihapon mabulingi ang rekord sa Super Pycnogenol and Hoop It Up-backed Cebu Institute of Technology (CIT) Wildkittens human nila gilubong ang Ave Maria Sanctuary Park sa iskor nga 72-59 sa 4th M. Lhuillier Kwarta Padala Under-21 Development Basketball League didto sa Consolacion Sports Complex.
Ang CIT Wildkittens ni coach Marvin Felicis mikompleto sa ilang pito ka duwa sa eliminasyon bitbit ang 7-0 win-loss record ug maoy lider sa Bracket A ning tulo ka buwan nga torneyo nga gimugna ni MLSDF executive director Eddie B. Ybañez.
Gumikan niini, ang CIT Wildkittens nakabaton og twice-to-beat incentive batok sa fourth-ranked University of the Visayas (UV)-Mandaue Academy sa quarterfinal round nga sugdan karong Sabado adto gihapon sa Consolacion Sports Complex. Ang Agukoy Consolacion nakabaton sab og susama nga pribilihiyo batok sa Barangay Pajo.
Sa Bracket B, ang MLSDF Selection ug Salazar Colleges and Science and Technology (SCSIT) Baby Skyblazers nakaangkon sab og twice-to-beat advantage sa ilang pakigbatok sa Cebu Fortune sa Lapu-Lapu City ug Consolacion National High School.