Shaw milubad

Sa una namong paghimamat, ang American promoter nga si Gary Shaw mura'g usa ka tigsangyaw og ebanghelyo nga misangyaw sa kaayo ug kainit sa mga Sugbuanon pagdawat kaniya.

Sa miaging mga adlaw, naglakwatsa dinhi sa Sugbu si Shaw tungod kay siya man maoy promoter sa Australyanong si Vic Darchinyan, nga ni-away sa Sugbuanong si Z Gorres niadtong Sabado sa gabii diha sa Waterfront-Cebu City Hotel and Casino. Kontrobersiyal nga natabla ang away.

Apan sa wala pa kini mahitabo, puwerting bayaw ni Shaw sa mga Sugbuanon kay matud pa niya, nakaadto na siya sa nagkadaiyang mga dapit sa kalibutan apan walay sama ang paghangop nga atong gidalit ngadto niya ug sa tibuok sakop sa Team Darchinyan.

* * *

Na-unsa bang pagka-unsaa nga kalit mang nausab ang kolor ni Shaw human nga natabla ang away nilang Darchinyan ug Gorres. Gikan sa tam-is nga mga pulong, panaway ug kasilag maoy iyang giluwatan sa tibuok nasudnong Pilipino.

Ako man gyud nga nakahinabi si Shaw human sa away ug kun akong hubaron sa Binisiya ang iyang gipanulti, kuwang na lang nga mo-ingon siya nga tungod sa nakita niyang surambaw nga desisyon, dili na ta makakita og Gary Shaw dinhi sa Pilipinas.

Ginawong ko ni Shaw sa pag-ingon nga kun duna man gani rematch, dili na kini mahitabo pa dinhi sa Pilipinas kay buang siya kun iya pang paawayon og balik si Darchinyan dinhi sa Pilipinas.

* * *

Imbes nga manaway, panaminan unta ni Shaw nga angayan pa gani siyang magpasalamat kanato gumikan kay patas ug makiangayon kaayo ang gipakanaog nato nga desisyon. Gani ang Sugbuanong hurado nga si Jonathan Davis mipadaog ni Darchinyan sa iyang scorecard sa iskor nga 114-112.

Kun dunay buthan si Shaw sa iyang kaligotgot, dili ang Philippine boxing kundili ang polpol nga reperi nga si Lance Revill ug ang duha ka mga hurado nga sila si Montol Suriyachand (Thailand) ug Cec Perkins (Australia).

Kun wala pa unta modesisyon og knockdown si Revill  bisan og klaro kaayong nadakin-as lang si Gorres sa unang hugna, dili unta mahimong kingkoy ang maong promosyon.

Tan-awa, ang mga Sugbuanon nga nanan-aw sa kasagmuyo nanglabay og mga basiyo sa mineral water, sinsiyo ug uban pang mga butang sa ring agi'g protesta sa tawag ni Revill.

Sukad niadto, nagkurog na ang tuhod ni Revill ug wala na kini makatarong pa og reperi kay nahadlok unsa unya ang reaksiyon sa mga nanan-aw. Ang resulta, daghan kaayong sipyat nga mga tawag si Revill nga maoy nakalawgaw og maayo sa nindot unta nga away.

Apan sa akong pagsumada sa tanang mga panghitabo, wala ko maka-uyon sa mga pamahayag ni Shaw. Nakasabot ko sa iyang gibati, apan iyang gipaghot ang sayop nga kahoy. Mao nang maka-ingon hinuon ko sa hilom nga pagka-plastik ba diay aning tawhana.

Mas maayo ra pud hinuon nga dili na siya moanhi dinhi sa Pilipinas gumikan kay iya mang gihatagan og negatibong impresyon ang pamaagi pagdala nato og boxing promotion dinhi sa nasud.

* * *

Alang sa inyong mga reaksiyon, mahimong mo-email sa [email protected]