Gisugdan sa Kings ug Rizal Commercial Banking Corporation (RCBC) ang ilang kampanya pagsakmit og titulo pinaagi sa paglansang og daog batok sa tagsa-tagsa nila ka kaatbang sa pagsugod sa 2008 Cebu United Bankers Association (CUBA) First Conference basketball tournament niadtong Domingo didto sa Visayan Glass Gym sa barangay Guadalupe, ning siyudad.
Gitumba sa Kings ang Bank of the Philippines Islands (BPI) sa iskor nga 76-56, samtang ang RCBC milubong og 23 puntos sa Spurs sa iskor nga 74-51.
Si Letrero milansang og 20 puntos, samtang sila si William Aparri ug Alex Macaling nagkumboya og 22 puntos alang sa Kings, kinsa milubong og 24 puntos sa BPI sa iskor nga 32-8 sa first quarter.
Namintenar sa Kings ang ilang double-digit apan sa ngadto-ngadto nahilis kini ug miabot na lang og 12 puntos human ang BPI mi-rally luyo sa paningkamot ni Julius Gastador sa ikatulong kuwarter.
Sa kaigmat sa Kings misaka og balik ang ilang labaw ngadto na sa 20 puntos, 57-37 paghuman sa third quarter.
Sa laing bahin, ang RCBC yano sab kaayong milubong sa Spurs human kini milusad og 19-8 run sa ikaduhang kuwarter ug giinat pa kini ngadto sa 14 puntos human sa tulo ka kuwarter sa iskor nga 49-35 paingon na ngadto pagkulit og kadaugan.
PUNTOS MATAG USA
Unang duwa:
Kings (76) - Latrero 20, Aparri 21, Macaling 10, Dabon 6, R. Chua 6, Go 6, Solon 4, Cortes 4, Yap 4, Castillo 4
BPI (56) - Gastador 14, Peralta 8, Teves 6, Auman 6, Mabanto 8, Cataros 8, Arreza 6
Ikaduhang duwa:
RCBC (72) - Ancajas 15, Padayogdog 10, Machado 10, Ocariza 10, Lawas 9, Diaz 8, Pestaño 6, Tingzon 4
Spurs (51) - Martinez 8, Tapaya 8, So 7, Lim 7, Cenita 6, Salis 6, Bernas 6, Olalo 2, Lapuz 1