Human sa ilang makapa-isa sa kilay nga daug batok sa defending champion San Antonio spurs ug runner-up sa miaging tuig Cleveland Cavaliers, ang New York Knicks na sab maoy gi-ihaw sa host Seattle SuperSonics sa ilang 86-85 nga kadaugan kagahapon sa nagpadayon nga 2007-2008 NBA season didto sa Key Arena sa Seattle, Washington.
Dihang nagka-upos na ang oras, higayon gihapon unta sa Knicks nga modaug kay labaw lang og usa ka punto ang Sonics apan si Renaldo Balkman wala makapasulod sa iyang duha ka free throws ug si Jamal Crawford nalimot nga singko segundos na lang ang oras ug dayong suway og hapos sa bola gikan sa three-point area nga natapalan ni Kevin Durant.
Ang 21 anyos nga si Durant maoy nangu sa Seattle sa iyang 21 puntos apan mas daku’g natabang si Chris Wilcox kinsa mi-iskor og 20 puntos apan mihakot sab og 20 ka rebounds.
Ang Sonic sigeng naglabaw sa second half bisan pa’g hilabwan sila’g gamay sa iskor sa fourth quarter, 24-23 pabor sa New York.
Si Zach Randolph maoy nangu sa Knicks sa iyang 23 puntos ug gisundan siya ni Crawford nga may 23 puntos. Sila si Quentin Robinson ug David Lee may 11 ug 10 puntos alang sa Knicks nga aduna’y 14-33 nga baraha nga igo lang sab milabaw og gamay sa Seattle nga adunay 12-35 nga baraha.
Bisan tua sila sa halayong dapit nga may 2,800 ka milya ang distansya, mitumaw gihapon ang singgit sa pro-New York fans nga “Fire Isiah” alang ngadto kang coach Isiah Thomas sa Knicks.
Sa laing bahin, gipaila ni Yao Ming nga mas maayo pa siya moduwa sa laing taga China nga si Yi Jinlian tungod kay ang Houston Rockets midaug man batok sa Milwaukee Bucks sa iskor, 91-83.
Si Yao mi-iskor lang og 12 puntos apan mas gamay ang kang Yi kay sayes puntos ra man ang nahimo.
Si Tracy McGrady maoy nangu sa Houston sa iyang 33 puntos ug 11 ka rebounds ug gi-abagan sab siya ni Bonzi wells ug Rafer Alston nga parehong mi-iskor ug tag 10 puntos. Ang Rockets aduna nay 27-20 nga baraha kumpara sa Bucks nga aduna’y 18-30 nga baraha.
Si Andrew Bogurt maoy nangu sa opensa sa Bucks sa iyang 21 puntos.
Sa laing duwa sa NBA, gilatos sa Orlando ang Indiana, 121, midaug ang Atlanta batok New Jersey, 104-92, daug ang Cleveland batok sa LA Clippers, gipukan sa Utah ang Memphis, 110-91, gilubong sa Denver ang Charlotte, 117-101 ug naka-ipsot ang Sacramento batok Chicago, 105-101.