Peñalosa versus Ponce De Leon matutuloy?

Sa pagkakabalam ng unang title defense ni Filipino world bantamweight champion Gerry Peñalosa kay Thai challenger Ratanachai Sor Vorapin, ang pangalan ni Mexican world super bantamweight titlist Daniel Ponce De Leon ang nababanggit.

Ayon sa adviser ni Ponce De Leon na si Jose Hernandez, maaari pa ring maituloy ang nasabing rematch ng 27-anyos na Mexican fighters at ng 35-anyos na Cebuano warrior.

Matapos ilusot ang kontrobersyal na unanimous decision sa kanilang unang laban ni Peñalosa noong Marso 17, pawang mga hindi magagandang title defense ang naipanalo ni Ponce De Leon.

“That’s the only fight we want and that’s the fight we need. Ponce didn’t look so good in that fight, and now he’s telling you that he wants to KO Peñalosa? I’m praying to God that he prepares himself well and looks good in his next fight,” ani Hernandez. “I’ll be happy that he goes 12 and gets the victory.”

Napanatili ni Ponce De Leon ang kanyang World Boxing Organization (WBO) super bantamweight belt mula sa kanyang panalo kay Peñalosa, ang kasalukuyang WBO bantamweight king.

Nabinbin ang unang pagdedepensa ni Peñalosa sa kanyang WBO bantamweight title sa 31-anyos na si Vorapin sa Marso 2 sa Araneta Coliseum bunga ng inaasahang mahinang pagpasok ng mga tv sponsors, ayon sa Golden Boy Promotions at ABS-CBN.

Inalok na ng Golden Boy sina Ponce De Leon at Hernandez para sa rematch kay Peñalosa kung saan itataya ng Mexican ang kanyang suot na WBO super bantamweight crown.(RCadayona)