Nagpangagot na ang Sugbuanong si Z 'The Dream' Gorres nga mohamag ni Armenia-born Australia knockout artist Vic 'The Raging Bull' Darchinyan sa gikatakdang 12 ka hugna nga IBF super flyweight eliminator nga maoy main event sa "Now or Never" card sugod karong alas 6:00 sa gabii diha sa Pacific Grand Ballroom sa Waterfront-Cebu City Hotel.
Si Gorres (27-2-1, 15KOs) ug Darchinyan (29-1-1, 23KOs) nagtangkil og managsamang misyon ug kini mao ang pagpamatuod nga aduna pa silay ikabuga aron mamahimong world champion sa umaabot.
Apan usa lamang kanila ang mopatigbabaw ug seguradong "huego-todo" nga kumbati ang ipabuhagay sa duha ka banggiitang boksidor.
Alang ni Gorres, naghinam-hinam na kaayo siya nga mosagubang sa malisud nga hagit batok ni Darchinyan, kinsa kanunay'ng manghambog nga tumbahon siya sa ilang engkuwentro.
"Excited na kaayo ko nga mo-away aron atong makita unsay resulta sa iyang panghambog nga iya kuno kong tumbahon," matud pa ni Gorres. "Grabe kaayo akong preparasyon ug taas kaayo ang kompiyansa nako sa akong kaugalingon nga ako siyang pildihon. Akong buhaton tanan nga makapakita ko og maayong away ug malingaw ang mga manan-aw."
Sila si Gorres ug Darchinyan managsama ang dalan nga gibaktas sa miagi nilang duha ka away.
Si Gorres napilde sa una niyang world title fight pinaagi sa controversial split decision batok ni WBO super flyweight champion Fernando Montiel sa Mexico niadtong Pebrero 24 dinhi sa Sugbu, samtang si Darchinyan nahuboan sa iyang korona isip IBF/IBO flyweight champion human malukapa sa ikalimang hugna batok ni Fil-Am Nonito Donaire Jr. niadtong Hulyo 7, 2007.
Sa iyang pagbalik og away, si Gorres mipakita og impresibong duwa pinaagi sa pagpakamang ni kanhi WBC light flyweight champion Eric Ortiz sa ikawalong hugna atol sa Boxing World Cup niadtong Agosto 11 sa miaging tuig didto sa Sacramento, California.
Susama sab ang gipakita ni Darchinyan, kinsa mipatikangkang sa Sugbuanong si Federico Catubay sa ika-12 nga hugna aron paglabni sa IBO 115-pound title sa katapusan niyang away niadtong Oktubre 20 sa miaging tuig didto sa New South Wales, Australia.
Karon nga nag-abot ang ilang dalan, ang mga mahiligon og boksing seguradong makasaksi og eksplosibong kumbati sa dihang sila si Gorres ug Darchinyan mag-ilog sa katungod aron mohagit sunod ni IBF super flyweight champion Dimitri Kirilov sa Russia.
Sa supporting main event, si RP light welterweight champion Mark Jason Melligen (9-1, 7KOs) makigharong ni Indonesian 140-pound champion Tia Koswara (15-5-2, 8KOs).
Lain pang mopakita og aksiyon mao sila si Romeo Jakosalem (6-2, 4KOs) sa Davao City vs. William Kickitt (8-0, 4KOs) sa Australia, James Bacon (3-1, 3KOs) sa ALA Stable batok Diosdado Perez (2-2) sa Manila, Rollen del Castillo (15-5-1, 7KOs) sa ALA Stable batok Fabio Marfa (24-19-4, 12KOs) sa Mandaue, Fil-Am JV Tuazon (2-1-1) sa New Jersey batok Rey Villar (0-2-1) sa Sultan Kudarat ug Alejandro Belonguel (4-1) sa Mandaue batok Ruel Cuizon (0-2-1) sa Manila.