M. Lhuillier duol na's 'grandslam'

Usa na  lang ka daog  ang kinahanglan  sa  M. Lhuillier Kwarta Padala-Cebu City Jewelers aron matuman ang ilang kampanya pagsakmit og talagsaong "grandslam" title pinaagi sa pagpalayas sa bisitang Pharex Medics sa iskor nga 108-94 sa 2008 Mindanao Visayas Basketball Association (MVBA) Sinulog Cup kagabii didto sa Cebu Coliseum.

Ang Jewelers ni Michel Lhuillier ug coach Raul 'Yayoy' Alcoseba nabiyaan og uno punto human sa unang kuwarter, 21-22, apan naliso ang dagan sa duwa human milusad og 29-19 run sa ikaduhang kuwarter aron pag-ilog sa labaw, 50-41 sa halftime.

Ang Jewelers  miposte sa ilang kinadak-ang labaw nga 19  puntos, 89-70 sa tunga-tungang bahin sa fourth quarter.

Katapusang mihulga og gukod ang Medics sa iskor nga 86-93 sa tulo ka sunod-sunod nga triples ni Emerson Oreta gumikan kay si Bruce Dacia  miposa og duha ka free throws, si  Woodrow Enriquez mi-iskor og kuwatro puntos ug gipun-an kini ni Gerry Cavan sa iyang break-away lay-up nga naghatag sa M. Lhuillier og 101-89 nga  bentaha sa nahabiling 1:35 sa duwa.

Si Dacia maoy topscorer sa M. Lhuillier sa iyang 20 puntos, gisundan ni Jayford Rodriguez  nga mikandos og 16 puntos, lakip na niini ang iyang back-to-back 3-pointers sa katapusang 16 segundos. Si Marlon  Basco mibugha  og 15 puntos, si Enriquez  miamot og 14 puntos ug si Ronald Capati mitampo og 12 puntos.

Si Oreta mao sab ang nangulo sa pilderong Pharex sa iyang 16 puntos, samtang sila Jam Alfad, Richard Ian Saladaga ug Don Villamin nagkumboya og 41 puntos.  Sila si Gilbert Bulawan ug Ronnie Bughao mi-ariya og 10 puntos matag usa alang sa ilang kaparotan.

Puntos Matag Usa

M. Lhuillier (108) – Dacia 20, Rodriguez 16, Basco 15, Enriquez 14, Capati 12, Cavan 8, Llanto 6, Bat-og 5, Singson 4, Padilla 2

Pharex (94) – Oreta 16, Alfad 15, Saladaga 14, Villamin 12, Bughao 10, Bulawan 10, Matias 8, Co 4, Gerilla 2, De Guzman 2

Quarterscores: 21-22, 50-41, 74-64, 108-94