Nagkinahanglan pa og overtime ang M. Lhuillier Kwarta Padala-Cebu City Jewelers una nila maangkon ang 116-107 nga kadaugan batok sa Montaña Pawnshop sa 2008 Mindanao Visayas Basketball Association (MVBA) Sinulog Cup kagabii didto sa Cebu Coliseum.
Ang Jewelers ni coach Michel Lhuillier ug coach Raul 'Yayoy' Alcoseba miharos og daog sa ilang duha ka duwa sa elimination round nga naghatag kanila og automatic berth alang sa crossover semifinals.
Miawop ang kasanag sa Jewelers dihang gibiyaan kini og sayes puntos, 92-98 sa nahabiling 1:20 sa duwa, apan nakan-an kini og tres puntos human masulod ang 3-pointer ni Stephen Padilla sa iskor nga 95-98 sa nahabiling 1:14 sa duwa.
Si Mike Manigo mitusak sa iyang ka free throws aron paghatag sa Montaña Pawnshop og singko puntos nga labaw, 95-100 sa katapusang 37 segundos sa regulasyon.
Bisan pa niini, ang Jewelers wala gihapon makabsi sa ilang paglaum. Si Dale Singson miposa og fadeaway shot ug mipasulod sab kini og 3-pointer aron pagtabla sa duwa nga
100-all sa nahabiling 14.6 segundos.
May purohan pa unta ang Montaña nga moilog sa duwa, apan si Tata Fernandez wala mapakasud sa iyang mahinungdanong itsa nga naghatod sa duwa ngadto sa overtime.
Si Marlon Basco mi-iskor ug gikan niadto ang Jewelers wala na molingi pa hangtod nga ilang naangkon sa hingpit ang kadaugan.
Sila si Basco ug Bruce Dacia maoy nangulo sa Jewelers nga mibugha og 24 puntos matag usa, si Singson mihirit og 12 puntos, samtang si Fernandez maoy sab ang nangulo sa pilderong Montaña sa iyang 33 puntos.