MVBA Sinulog Cup buksan karon

Ang Mindanao Visayas Basketball Association (MVBA) pormal nga mosikad sa mga kalihukan ning tuiga pinaagi sa pagbukas sa ML Kwarta Padala Sinulog Cup karong hapon diha sa Cebu Coliseum.

Ang M. Lhuillier Kwarta Padala-Cebu City magsugod sa ilang kampanya pagsakmit og grandslam title dihang makigharong kini batok sa Toyota-Balintawak Road Kings sa pasiunang duwa  sa alas 4:30 sa hapon.

Sa dili pa sugdan ang kumbati, usa ka opening ceremonies ang himuon sa alas-3:30 sa hapon.

Sa main game sa alas 6:00 sa gabii, ang Pharex Medics makigtige batok sa Fifth Avenue Telecoms.

Walay duwa sa unang adlaw sa kumbati ning torneyo nga gipaluyohan sa Samahang Basketbol ng Pilipinas (BAP-SBP)   ang Montana Pawnshop-Davao ni Armando Quibod ug Hotel Fortuna-Boljoon ni Lorenzo 'Chao' Sy ug Mayor Deogenes Derama nga gibitoonan sa mga batos sa University of the Visayas (UV) Green Lancers ni coach Elmer Cabahug.

Mga pinasidunggang dinapit sa opening ceremonies mao sila si Cebu City Vice Mayor Michael Rama ug BAP-SBP Cebu head Lorenzo 'Chao' Sy.

Ang Sinulog Cup gipaluyohan sa ML Kwarta Padala, Hotel Fortuna, Yayoy’s Grill ug Gameface.Ph.

Gumikan sa presensiya sa tulo ka lig-on nga koponan gikan sa kaulohan, ang M. Lhuillier mag-atubang og lisud nga hagit sa tinguha niini nga makasakmit og tulo ka sunod-sunod nga korona sa Sinulog Cup.

Gumikan niini, si coach Raul 'Yayoy' Alcoseba gikinahanglan nga makabaton og maayong duwa gikan nilang Bruce Dacia, Woodrow Enriquez, Stephen Padilla ug Jayford Rodriguez ug ingon man nilang Marlon Basco, Ronald Capati ug Leo Bat-og. 

Aron pagpalig-on og maayo sa ilang puwersa, gikuha sa Jewelers ang serbisyo ni kanhi PBA star guard Dale Singson ug ingon man gi-reactive niini si back-to-back Cebu collegiate MVP Enrico Llanto gikan sa reserve list.