CCC batch 1987 reunion  himuon na karon sa Baseline Restaurant

Himuon na karong adlawa ang reunion sa Cebu City Colleges (CCC) nga karon University of Cebu (UC) Junior Executives batch 1987 sa alas-5:00 sa hapon anha sa Baseline Restaurant.

Ang 1987 junior team maoy labing malampusong koponan sa kasaysayan sa University of Cebu.

Ang team nilangkat sa 1987 junior crown human gipukan ang San Beda Red Lions nga gipangulohan ni Benjie Paras sa final didto sa Baguio City.  Subli kining nakampiyon pagka  sunod tuig pinaagi sa pagpukan sa FEU Baby Tamaraws didto sa Manila.

Ang team gilangkuban nilang Ritchie Bacalso, Kenneth Aliño, Arnulfo Santos (deceased), Bert Flores nga karon coach na sa Far Eastern University, Reggie Licanda, ang coach sa UC Junior Webmasters, Michael 'Billy Ray Bates' Dumdum, Jessie  Bardaje, Jeffrey Gabuya, Choy Aranio ug Aldrin Barola ug niadtong higayona ang ilang coach mao si Mariano Agas Sr.

Si Bacalso, ang mipasiugda ning maong kalihukan mipadayag sa Banat News nga ang rason sa ilang paghimo og reunion mao ang pagpasidungog sa usa sa ilang teammates nga si Santos, kinsa namatay tungod sa cancer.

Dugang pa niya nga sila si UC president Atty. Augusto W. Go, team manager Atty. Baldomero C. Estenzo, coaches Joaquin Rojas ug Mariano 'Dodong' Agas Jr. ug trainer/statistician Eddie Montalban ang gilaumang motambong sa maong katuyoan.

Si Naga City Mayor Val Chiong,  magduduwa kanhi sa UC gilauman sab nga motambong uban sa laing UC players nga naglakip nilang Harley Son (nga karon nagbase sa Australia), Erwin Francisco, Ope Abellana, Julius Gastador, Alex Armenion, Rocky ug Baban Bacalso, Alfredo Leyson, Ralph Ybañez ug uban pa.

Niadtong interesadong moapil sa reunion mahimong motawag ni Bacalso sa  0926-248-1391.