Aksiyon sa 4th MLSDF Under-21 League mobalik sa Sabado

Ang aksiyon sa 4th M. Lhuillier Kwarta Padala Under-21 Developmental Basketball League mobalik karong Sabado diin upat ka duwa ang itagana diha sa Consolaction Sports Complex.

Sa unang duwa nga gitakda  sa alas-9:00 sa buntag, ang MLSDF Selection ni coach Eddie B. Ybañez naglaraw nga mokulit sa ilang ikatulong daog sa upat ka duwa dihang ilang harungong ang University of San Carlos (USC) Warriors, samtang ang Cebu Institute of Technology (CIT)-Firefly nagtinguha sab sa ilang ikaduhang sunod-sunod nga kadaugan dihang ilang batukan ang Compostela National High School (CNHS) sa ikaduhang duwa sa alas-10:30 sa gabii.

Ang CNHS wala pa gihapon makatilaw og daog sa duha ka duwa.

Ang mga duwa sa hapon nga sugdan sa ala-1:00 sa hapon, ang Pajo National High  School buot nga mosanta sa ilang duha ka sagidas nga kaparotan dihang ilang sangkaon ang Garing National High School nga nangindahay sab nga modaog human sa ilang kapildihan sa una nilang duwa.

Sa main game sa alas-2:30 sa hapon, ang  Ave Maria Sanctuary Park mosuway og inat sa ilang 1-1 win-loss record sa ilang pakighamag   sa University of Southern Philippines Foundation (USPF) Baby Panthers,  kinsa nagtabla sa ikaduhang dapit uban sa Agukoy-Consolacion sa Bracket A nga adunay managsamang 2-1 win-loss records.