Ang Tour  ni Frank gitakda sa Enero 26 ug 27

Sugdan sa mga Cebuano riders pagpakita sa ilang abilidad niining tuiga pinaagi sa pagsalmot sa  6th Luzvimin (USA)-Cebu Recycle Race nga pagaulohan sab og "Ang Tour ni Frank"  karong Enero 26-27.

Ang lumba sugdan pinaagi sa Epic Ride III karong Enero 25  diin ang mga cyclists mosikad og kapin sa 180 kilometros libot sa probinsiya sa  Sugbu.

Sa Enero 26, ang cyclists mosugod na og tour (criterium) nga anha manukad  sa Mandaue City Reclamation area  ug ang lumba sa hapon anha manukad sa JY Square paingon sa Buak.

Usa gihapon ka road race gikan sa Danao paingon sa Lugo ug balik ang ipahigayon sa katapusang adlaw sa kompetisyon.

Ang matag team langkuban og dili momenos unom ka riders nga gibahin ngadto sa B-C, C (over 45) ug ang recreational riders categories.

Ang top three teams gikan sa tagsa-tagsa ka kategoriya makadawat og mga tropeyo,  samtang ang top three cyclists sa duha ka dibisyon (B-C, C) makadawat usab og tropeyo.

Gawas pa niini,  ang  "King of the Mountain"  gikan sa tagsa-tagsa ka kategoriya makadawat og P500 matag usa.

Mopadagan sa maong kompetisyon mao si race organizer Frank Gatdula  kinsa nakakuha og suporta gikan sa US-based Luzvimin Cycling Club,  RECYCLE ni Mark Ilanan, Danao City Sports Commission, Vellum, Cebu Cycling.com, Rocka Bikeshop, Terry Larrazabal Bike Festival, Vicekleta, Bikeroom ug  sa Filipino-Chinese Cycling  Federation of the Philippines.