Mobanat na ang mga inila ug banggiitang kickboxers sa pagsikad sa 1st Poblacion Oriental K1 Kickboxing Superfights 2008 - Cebu Champions vs. Negros Stars karong alas-7:30 sa gabii diha sa New Consolacion Sports Complex, lungsod sa Consolacion.
Ang kulbahinam nga engkuwentro sa natad sa full-contact kickboxing maoy labing unang kompetisyon sa tuig 2008 sa DBD Tigers Hall of Martial Arts SDG ni Master Dann B. Diaz.
Mobanat sa 5-rounder main event mao sila si Jojo Dejito sa Arcom jukai sa San Carlos City batok ni Junrey Sukite sa Durex Dragon sa Lapu-Lapu City, Jing Jing Diaz sa Tigers Hall batok Jun dela Torre sa Cemac Muaythai ug Bronz Diaz sa Lacion Star batok ni Frankie Bacomo sa Bacolod City.
Lain pang 13 ka parisan ang masaksihan sa supporting main event.
Ang maong torneyo nga usa sa mga highlights sa tinuig nga pangilin sa ilang mahal nga patron Holy Family gipaluyohan usab sa maabtikong kapitan sa Poblacion Oriental nga si Melquiades 'Leking' Caylan, kickboxing coordinator konsehal Paul Alelu Flores ug kaubanang konsehales ug Taboy Abinales & Sons.