USJ-R nakabawos na sa USC

 Milampos ang University of San Jose-Recoletos (USJ-R) Spiking Jaguars sa pagpanimalos sa University of San Carlos (USC) Golden Booters  pinaagi  sa  2-0 nga kadaugan aron  usab yukboan isip bag-ong kampiyon sa football event  sa Cebu Schools Athletic Foundation, Inc. (CESAFI)  kagahapon didto sa USC-TC football field sa Talamban.

Tam-is nga panimalos ang naangkon sa USJ-R nga napilde sa final sa miaging  tuig batok gihapon sa ilang karibal nga USC.

Ang duha ka kampo pulos wala maka-iskor sa first half. Sa maong duwa, upat ka players ang gisagpa og yellow card matag usa isip warning sa ilang unsportsmanship behavior. Kini naglakip nilang Joven Torres,  Paul dela Victoria, Arlon Sabal, Edward Lachica ug Eduardo Buglasa.

Bisan pa niini, si USJ-R coach Joselito Bono milukmay sa iyang mga players ug gimandoan nga mo-concentrate sa duwa ug moduwa kutob sa ilang mahimo.

Gumikan niini, sila si Robert Mamac ug  Anselmo Palmones mipabuhagay sa ilang talento ug milansang og goal matag usa nga nakatambal sa kauhaw sa USJ-R, kinsa miangkon og balik sa trono human sa duha ka tuig nga pagpaabot.

Ang USJ-R maoy hari niadto sa CESAFI collegiate football hangtod nga gibugto sa University of the Visayas (UV) ilang pagdominar niadtong 2005.

Ang Spiking Jaguars nakasulod sa  championship sa miaging tuig apan napilde kini sa USC.

Sa bugno alang sa ikatulong dapit, ang University of Southern Philippines Foundation (USPF) Spiking Panthers mipukan sa University of Cebu (UC) Webmasters pinaagi sa penalty shotout, 4-2.

Naka-iskor alang sa kadaugan sa USPF mao sila si John Cosayan, Rodriguez, Deck Pacaña ug Jonathan Tan.