Boston nabunalan sa Pistons

Wala nay team nga hapsay gihapon ang record sa kaugalingon nilang nataran human mohagsa ang Boston Celtics gikan sa mga kamot sa Detroit Pistons sa nagpadayon nga 2007-2008 season sa National Basketball Association (NaBA) didto sa Banknorth Garden sa Boston, Massachussetts.

Si Chauncey Billups maoy nagtuboy sa kadaugan sa Pistons sa iskor 87-85 pinaagi sa duha niya ka free throws 0.1 na lang ang nahibiling oras human siya makakubit og foul gikan ni Tony Allen sa Celtics.

Si Billups maoy nangu sa Pistons sa iyang 28 puntos, 12 niini sulod lang sa fourth quarter lakip ang duha ka free throws nga maoy nagtuboy ngadto sa kadaugan.

“I knew there was enough time to get a pump fake, if I didn’t have a clean look and I saw him running at me”, matud pa ni Billups kinsa aduna nay 11 ka season sa NBA ug sakop sa kampiyon nga team sa tuig 2004.

Bisa’g si Kevin Garnett, ang top scorer sa Celtics nakadayeg kang Billups. “Chauncey’s one of the best clutch players in the league”, matud pa niya.

Si Garnett mihakot og 26 puntos ug 12 ka rebounds samtang si Ray Allen mi-iskor og 24 puntos ug sila si Rajon Rondo ug Paul Pierce may 14 puntos ug 11 puntos alang sa Boston.

Si Richard Hamilton mi-iskor og 21 puntos ug si Antonio McDyess may 13 puntos alang sa Pistons kinsa aduna nay 18-7 nga baraha.

Bisan sa ilang kapildehan, lider lang gihapon ang Boston sa ilang 20-3 nga baraha.

Ang Boston mitabla sa ilang pinaka-maayong sugod nga nakab-ot sa 1963-64 nga team nga mao sab ang nahimong kampiyon niadtong tuiga. Ang best homecourt record sa Boston 17-0 sa 1957-58 season.