Visayan Ballers naka-angkon luna sa semis

Nakaangkon og lingkoranan sa semifinals ang Visayan Ballers human makaipsot batok sa Vicente Sotto Memorial Medical Center (VSMMC) cagers sa 3rd Lucky Tableware Basketball Tournament didto sa Visayas Glass Gym sa barangay Guadalupe, ning siyudad.

Gitapos sa Visayan Ballers ni Senen Marturillas ang eliminasyon nga 5-1 win-loss record ug nagtabla uban sa Julia's Resto Bar. Apan ang naulahi maoy nakaangkon sa unang  dapit tungod sa superior quotient.

Sila si Paul Alvarez ug Frederick Castañeda mihaling og 19 puntos matag usa alang sa Visayan Ballers nga maoy mikontrolar sa duwa pagsugod gyud sa engkuwentro diin milabaw kini og otso puntos sa iskor nga 31-23 sa halftime.

Ang Visayan Ballers namugnaw sa third quarter hinungdan nga ang VSMMC ni Daks Nutia nakatabla, 39-39 ug  gani ila pang nailog ang labaw, 45-42 sa daginutong minutos sa final period.

Apan, ang Visayan Ballers mihimo og mga kausaban sa himalatyong minutos sa duwa aron  pag-ilog og balik sa labaw.

Sila si William 'Iam' Aparri, Robert Rafson Chua ug Dax Navarrip nagkumboya og 18 puntos alang sa Visayan Ballers.

Sa laing duwa, si JR Luceño miduslit og 18 puntos alang sa  Halley's Team ni Edgar Cañete nga milubong sa Julia's Resto Bar sa iskor nga 52-39.