Underdogs mag-abot sa Power Forty finals

Wala damha sa Fag Machine  nga  makahimo og dakung upset dihang ilang gipakuratan ang Hero Commando sa iskor nga 105-103  sud sa duha ka overtime aron pag-abante sa finals sa Power Forty Basketball Tournament Christmas League didto sa Inayawan Sports Complex.

Ang Amihan Bag  ubos sa pagpangulo ni Michael Arias  nakasud usab sa finals human gipalayas ang Christine Traders sa iskor nga 102-91.

Si Arias, ang kandidato pagka-MVP miposte og 48 puntos nga maoy labing dakung  iskor nga natala sa kasaysayan sa liga.

Ang Fag Machine ug Amihan Bag sa finals karong Martes sa gabii human sa duwa tali sa Hero Commando ug Christine Traders nga mag-ilog alang sa ikatulong dapit. 

Si Efren Mosqueda maoy nangulo sa Fag Machine nga adunay  27 puntos,  giabagan sab kini nilang  councilor  Mario Tabar ug Hermes Abasolo nga nagkumboya og 39 puntos aron pagpukan sa Hero Commando, kinsa maoy nanghawod  sa eliminasyon.

Nagkadipo-dipo og maayo ang Hero Commando hinungdan nga bisan pa sa ilang kahanas nakahimo gihapon ang Fag Machine paglugway og dugang singko minutos sa duwa sa makaduha ka higayon. Unang nagtabla ang duwa sa iskor  nga 83-all ug  ang ikaduhang overtime sa iskor nga 96-all