CIT, USJ-R gisubhan og daog sa Partner's Cup
Wala magbasol ang mga dumuduong nga misaksi sa unang aksiyon sa Reinforced Partner's Cup niadtong Domingo kay ilang nasaksihan ang makapaukyab nga mga duwa didto sa Cebu Coliseum.
Mga duwa karon
(
Ang CIT/Metro Gaisano mipukan sa DBTC-Unilab Alaxan sa iskor nga 89-88 ug ang USJ-R/Bibbo Hotdog midaog sa USPF/R. Lapid's Chicharon pinaagi sa overtime sa iskor nga 102-98.
Naglawig na unta sa sayo nga kadaugan ang USJ-R apan tukwahaw lang misumbalik kanila ang USPF bisan pa’g nagtakilid na kini tungod sa ilang 13 puntos nga biya, 87-74 sa katapusang 4:24 sa duwa.
Si Jordan Bardillas nangulo sa mainitong rally sa USPF aron pagpahilom sa sabaang USJ-R.
Paingon na unta sa kadaugan ang USJ-R human kini milabaw og tres puntos, 89-86 sa katapusang 8.4 segundos apan ang USPF maoy naa sa posisyon sa nahabiling 1.5 ug gilambuyog na lang ni Michael Sereño ang bola ug didto kini mahagsa sa ilawon sa net aron pagtabla sa duwa, 89-89.
Sa overtime, medyo nahubaghubagan ang USJ-R kay tulo sa unom nila ka free throws wala manulod, apan giluwas kini nilang Jabe Delfino, Ranulfo Malinao ug Manny Gabas pinaagi sa pagpatusak sa ilang mga free throws.
Si Lyndon Gudez maoy nangu sa USJ-R sa iyang 18 puntos, gisundan ni Delfino kinsa midugang og 16 puntos, si Gabas mitampo og 13 puntos samtang si Bobby Hatague miani og 11 puntos.
Ang pilderong USPF gipangulohan ni Johyn Gulane kinsa mibugha og 21 puntos, samtang si Elvis Labares miamot og 19 puntos.
Sa sayo pa, si Sherwin Abobo miposa og 21 puntos ug ang beteranong si Jerry Jaca mihimo og 20 puntos alang sa CIT, samtang ang DBTC gipangulohan ni Jayford Aldave sa iyang 23 puntos.
- Latest
- Trending
