Bogo Bogoys nanghasi sa Cebu Niños sa Inter-city
Wala igsapayan sa Bogo Bogoys ang ilang makutas nga biyahe gikan sa norte kay ang kalapoy gisuklian man og dakung kadaugan batok sa host-Cebu City Niños sa iskor nga 94-89 niadtong Biyernes sa gabii sa Inter-city Cup basketball challenge didto sa Poblacion Pardo.
Ang Bogo Bogoys milabaw lang og kuwatro puntos sa halftime, 44-40 apan kalit lang kining niburot ngadto sa 15 puntos dihang sila si Noel Balili ug Jerome Seno mipasiugda og 8-0 blitz sa nanghinapos nga bahin sa third period sa iskor nga 66-51.
Nakaginhawa og gamay ang Niños dihang naguba ang duwa sa Bogoys hinungdan nga nakan-an ang labaw ngadto na lang sa kuwatro puntos, 75-79 sa nahabiling
Samtang pisikal ug mainiton ang duwa, ang mga coaches sa matag habig nagsige sab og reklamo sa referee hinungdan nga hapit magkalalis sila si komisyado Boy Murillo ug Bogoys assistant coach Glenn Yuson.
Nagbahis si Seno sa ikaduhang kuwarter diin mi-iskor og 12 sa kinatibuk-an niyang 23 puntos, apan si Jun Ace Ursal maoy nangulo sa Bogoys sa iyang 29 puntos lakip na ang unang 13 puntos nga iyang gikati alang sa Bogoys gikan sa 0-7 sa sayong bahin sa duwa.
Si Paul 'Butong' Villanueva mitapos og 24 puntos alang sa Cebu City Niños, samtang si Allen Abayata miamot og 22 puntos.
Nibahar og gamay ang duwa ni Villanueva tungod sa hugot nga depensa nga gipatuman ni Rico 'Tigas' Batuigas kaniya.
Ang Bogoys nagtabla na karon uban sa Lapu-Lapu Chiefs sa managsamang 4-1 win-loss record, samtang ang Cebu City Niños adunay 1-1 win-loss record ning maong liga nga gipaluyohan usab sa Nature’s Spring, CFL Focus, Omega Pain Killer, Efficascent Oil, Casino Rubbing Alcohol, Yayoy’s Grill, MLKP ug Hotel Fortuna.
PUNTOS MATAG
Bogo (94) -- Ursal 29, Seno 23, Balili 17, Lubon 7, Pedroza 4, Asingua 4, Batuigas 3, Valenzuela 3, Tudtud 2
Cebu (89) -- Villanueva 24, Abayata 22, L. Maraño 9, Abellanosa 6, Potencioso 6, R. Maraño 5, Tallido 4, Cabo 4
- Latest
- Trending
