Nagkinahanglan pa og overtime ang defending champion M. Lhuillier Kwarta Padala-Cebu City una pa kini naka-eskapo sa makalilisang nga hagit sa Cebu Landmaster-Mandaue sa iskor nga 89-86 sa Game-1 sa "best-of-three" Visayas Division Finals sa 2007 Mindanao Visayas Basketball Association (MVBA) Second Conference niadtong Miyerkules sa gabii didto sa Cebu Coliseum.
Hayan nga sakmiton na sa M. Lhuillier ang korona kun maangkon nila ang Game-2 nga sugdan sa alas 5:30 sa hapon diha sa Mandaue City Cultural and Sports Complex.
Ang Jewelers nagdanga-danga na unta sa hapsay nga kadaugan human sila milansang og 16 puntos nga labaw, 76-60 human sa 3-pointer ni Marlon Basco sa nahabiling 4:56 sa regulasyon.
Apan ang Jewelers kompiyansa kaayo ug kalit kini mikolapso. Gipahimuslan og maayo sa Landmaster ang kahigayonan aron pagpabuto og 18-2 nga bomba nga gitak-op sa duha ka sunod-sunod nga 3-point shots ni Mike Manigo nga maoy nakapatabla sa iskor, 78-78 sa nahabilin nga 13 segundos.
Sayo unta nga maangkon sa M. Lhuillier ang kadaugan, apan si Jet Latonio nasipyat sa iyang itsada dayong kapupos sa oras hinungdan sa overtime.
Sa extension, si Stephen Padilla na sab mikiat ug mikulit kini og singko puntos lakip na ang iyang 3-pointer nga maoy nakapalabaw sa M. Lhuillier og tres puntos sa iskor nga 87-84.
Makapuwersa pa unta ang Landmaster og ikaduhang overtime, apan nasipyat si Richard Ian Saldaga sa iyang itsada dayong kahurot sa oras.
Si Ronald Capati maoy nangu sa M. Lhuillier bitbit ang 17 puntos ug gisundan Basco nga mitampo og 15 puntos. Upat pa ka Jewelers ang mitali og double digits. Si Gerry Cavan adunay 14 puntos, Woodrow Enriquez mihipos og 12 puntos, Lou Gatumbato miamot og 11 puntos ug si Bruce Dacia mitapos og 10 puntos.
Si Mark Yee miratsada og 24 puntos, 14 ka rebounds ug lima ka blocks alang sa Landmaster.