Cebu City, Talisay City sul
Ang Cebu City Niños maoy mo-host sa bisitang Bogo City Bogoys sa pagpadayon sa Inter-city basketball challenge karong adlawa diha sa Inayawan Sports Complex.
Sa Talisay City, ang Aquastars modepensa sab sa ilang balwarte atol usab sa pagpanulong sa Danao Pistons. Ang Aquastars nagtinguhang mokulit og 2-0 record sa ilang balwarte.
Sa unang duwa sa Cebu City Niños, wala kaayo kini mopakita og dakung milagro ug naglisod kini sa ilang engkuwentro batok sa Talisay Aquastars niadtong Nobiyembre 30 diin igo lang kini milabaw og dos puntos sa ilang 73-71 nga kadaugan pinaagi sa free throws ni Butong Villanueva.
Ang Cebu City Niños igo lang sab milabaw og dos puntos sa ilang 96-94 nga kadaugan batok gihapon sa Talisay Aquastars sa ilang goodwill match niadtong Nobiyembre 17 nga maoy highlight sa inaugural season sa Inter City didto sa Don Celestino Martinez Sr. Memorial Coliseum sa Bogo City.
Sa dagan sa maong duwa, masabtan sa Cebu City Niños nga dili kaayo impresibo ang ilang mga kadaugan, apan gikonsiderar gihapon sila nga legitimate title contenders.
Ang Cebu City Niños naglantaw sa ilang ikaduhang daog.
Sa laing bahin, ang Talisay Aquastars (1-2) nagtinguhang moinat sa ilang baraha sa ilang pakigsangka batok sa Pistons nga nagbitbit usab og 1-2 win-loss record ning maong torneyo nga gipaluyohan sa Nature’s Spring, Omega Pain Killer, Efficascent Oil, Casino Rubbing Alcohol, CFL Focul Lamp, Yayoy’s Grill, M. Lhuillier Kwarta Padala ug Hotel Fortuna.
- Latest
- Trending
