Hindi dumayo sa Pilipinas sina Mexican fighters Antonio “Barrio” Meza at Jovanny “Bambino” Soto para matalo lamang.
Ipinangako kahapon ng 25-anyos na si Meza at ng 23-anyos na si Soto ang kanilang panalo laban kina Filipino fighters Rey “Boom Boom” Bautista at AJ “Bazooka” Banal sa Disyembre 2 sa Araneta Coliseum.
“We are in great shape and we are here to win,” wika ni Meza, nagbabandera ng 23-3-0 win-loss-draw ring record kasama ang 16 KOs kumpara sa 23-1-0 (17 KOs) ng 21-anyos na si Bautista. “Boom Boom is a great fighter and I know how I’m gonna fight and beat him.”
Itataya ni Bautista, tubong Candijay, Bohol, ang kanyang suot na World Boxing Organization (WBO) International super bantamweight crown laban kay Meza.
Ito ang kauna-unahang laban ni Bautista matapos mapabagsak sa first round ni WBO super bantamweight champion Daniel Ponce De Leon noong Agosto 11 sa Arco Arena sa Sacramento, California.
Si Soto ay sinasanay ni Mexican trainer Edgar Cardenas na siyang nangangasiwa sa preparasyon ni Mexican challenger Luis Maldonado para sa laban nito kay International Boxing Federation (IBF) at International Boxing Organization (IBO) fyweight titlist Nonito “The Filipino Flash” Donaire, Jr. sa Disyembre 2 sa Foxwoods Casino sa Mashantucket, Connecticut.
Katulad ni Meza, kumpiyansa rin si Soto na matatalo niya ang 18-anyos na si Banal para sa WBO Youth super flyweight title.
“I have prepared for this fight for two months and I have sparred with some lefthanded fighters that are similar to the style of AJ Banal,” sabi ni Soto, nagdadala ng 25-7-1 (20 KOs) card, habang dala naman ni Banal ang 15-0-1 (12 KOs) slate. (RC)