Ang katapusang masayop

Sa pagdula og bilyar, ang magdudula nga maoy katapusang makahimo og sayop maoy posibleng mapilde. Ang pagbase niini gisandig sa matag rack. Sa usa ka rack, kun ang magdudula molampos sa paghimo’g scoring break, daku kaayo ang kahigayonan nga maka-score siya sa maong rack. Pero kun makahimo siya’g dry break, posibleng adto mopabor ang kahigayonan sa iyang kaatbang.

Sa pagpahigayon pa lang sa break, kinahanglang makapasulod ang magdudula og object ball aron dili makakuhag turno ang iyang kaatbang sa pagtira. Paunhanay man gud ang batakan sa dulang bilyar. Kinsa gani kadtong makaunag makada og score, lisud na siyang maapsan labin na’g moabot ngadto sa lima ka racks ang labaw. Hinuon, may mga higayon nga maapsan pa ang maong gidak-on sa labaw sa kaatbang kun makakaplag og daghang openings ang preparasyon niini.

Pero kinahanglan gyud laging maneguro pagkamada og score ang magdudula aron dili siya maapsan sa dakung kasayon sa iyang kontra. Kutob sa mahimo, likayan ang paghimo’g error labina sa naghinapos nga bahin sa rack o sa katibuk-ang hugna sa dula mismo. Kinahanglang magmatngon siya nga dili masayop kay ang katapusang masayop mao ang magdudula nga hayan mapilde sa dula.

Ang pagpakasayop anaa sa iyang mga kamot. Kun makontrolar niya ang iyang kaugalingon, mamenosan ang sayop ug modaku ang kahigayonan sa pagdaog. Angay timan-an kanunay nga sa dulang bilyar, ang magdudula nga maoy nakakuha sa turno sa pagtira maoy adunay dakung kahigayonan sa pagdaog.

Kun sa iyang pagpakasayop nahatagan pag kahigayonan ang magdudula nga makatira pag-usab, angay na niyang hugtan ang iyang bakus. Kinahanglang mapasulod na niya ang tanang mga bola aron makapahimulos siya sa sayop sa iyang kaatbang.

* * *

MAGBILYAR TA TEXTMATE PORTION: 0910-3145519, 0920-3362564, 0910-5944596, 0919-2304529, 1919-270-9719, 0910-8454037 ug 0920-2513774. Text na.

* * *

(Mga sugyot ug pakisayod? Text sa 0910-8105522)