SCBHABA sud na sa semis
Wala pa gihapon mabulingi ang dungog sa M. Lhuillier-San Carlos Boys High Alumnis Basketball Association (SCBHABA) dihang mikulit na sab kini og laing kadaugan batok sa Barkada-Rama Boys sa iskor nga 76-60 aron pag-angkon og lingkoranan sa semifinal sa 1st MP Cup Invitational basketball tournament niadtong Domingo didto sa University of San Carlos (USC)-main gym.
Uban ang 7-0 win-loss record, ang SCBHABA segurado na usab nga mokatkat sa sunod nga hugna bisan pa og madiskuhedo kini sa ilang katapusang duwa sa elimination round batok sa Samsung-Punta Princesa Sports Association (PPSA) karong Disyembre 1.
Ang PPSA miinat sab sa ilang win-loss record nga 6-1 pinaagi sa pagposte og 78-63 nga kadaugan batok sa Crunchicken-Jaycees Basketball Association (JBA).
Si Virgil 'Bing' Pua maoy nangulo sa iyang 14 puntos, gisundan ni James Lu nga miligwat og 11 puntos.
Sila si John Andrew Auza ug Bonito Zanoria pulos miamot og 10 puntos alang sa SCBHABA nga nag-ong-ong na sa kadaugan human makabentaha og otso puntos sa iskor nga 63-43 sa final quarter.
Si Cebu City vice mayor Michael 'Mike' Rama mibugha og 16 puntos, samtang si Reynaldo Zamora mihirit og 14 puntos alang sa Rama Boys nga midailos sa ikatulo nga dapit sa Bracket B nga adunay 5-2 win-loss record.
Sa kumbati sa Bracket A, ang MS Motosuit-UBC ni sports patron Lou Ornopia nag-ong-ong na sa ganghaan sa semifinals human sa ilang kadaugan batok sa Philippine Farmers Bank-Integrated Bar of the Philippines sa iskor nga 76-55.
Kun ang (6-1) nga MS-Motosuit-UBC modaog sa ilang duwa batok sa Cebu Metropolitan Water District (MCWD) Quenchers karong Biyernes makakuha na kini'g automatic semifinal berth.
Sa naandan, si Lopesino Bontia mao na sab ang nangulo sa UBC nga mipupo og 18 puntos, gisundan nilang Delfin Bontuyan ug Geryl Bukiron nga mibugwal og 10 puntos matag
Si Richard Bauzon, kinsa milansang og 20 puntos mao usab ang nangulo sa pilderong IBP nga adunay 3-4 win-loss record, gisundan ni Samuel Malazarte nga adunay 15 puntos.
PUNTOS MATAG
Unang duwa:
UBC (76) - Bontia 18, Bukiron 10, Bontuyan 10, Arceo 9, Gonzaga 8, Diaz 6, Bongo 4, Lapiña 2, Bongo 2, Dicdican 2, Castro 2
IBP (55) - Bauzon 20, Malazarte 15, Pepito 6, Gamallo 5, Pepito 5, Dumon 4
Ikaduhang duwa:
SCBHABA (76) - Pua 14, Lu 11, Auza 10, Zanoria 10, Odulio 8, Sausa 7, Diaz 6, Sepe 3, Medija 3, Wong 2, Moriles 2, Velayo 2
Rama Boys (60) - Rama 16, Zamora 14, Alcover 10, Bacullo 9, Molina 7, Borres 2, De la Calzada 2
- Latest
- Trending
