Hingpit na nga miabante ang Holcim Pryce Pharma-MisOr sa Mindanao Division Finals human gibanhigan ang Goldstar Hardware Duterte Agilas-Davao sa iskor nga 84-68 sa 2007 Mindanao Visayas Basketball Association (MVBA) Second Conference niadtong Huwebes didto sa Xavier University Gym.
Ang MisOr nila ni MVBA chairman Gov. Oscar Moreno ug coach Bong Abad mitak-op sa ilang "best-of-three" series nga 2-0.
Mao na kini ang ikatulong higayon nga miratsada ang MisOr sa Mindanao Finals ning maong liga nga gipasiugdahan sa Samahang Basketbol ng Pilipinas (BAP-SBP) inabagan sa ML Kwarta Padala, Nature’s Spring, Sulpicio Lines, Accel, Cokaliong Shipping, Reva Sandals, Gameface.Ph ug Nike Basketball.
Ang girapidong 13-0 run sa MisOr sa katapusang hut-ong mao ang diskarel sa diskarte sa Agilas nga nalubong og 22 puntos, 79-57 sa nahabilin nga 5:30. Apan nakahimo pa kini pagkitkit sa labaw ngadto na lang sa nuybe puntos sa iskor nga 57-66 sa ikatulo. Apan ang Agilas wala makasustiner sa maong duwa dihang si Lowell Briones mipauwan og 3-pointers.
Si Nathaniel Cruz mao ang miwadwad sa MisOr nga mitimang og 18 puntos. Miabag sab ang laing lima niya ka mga kaubanan diin mikulit og double-figures. Si Ramil Tagupa mihimo og 12 puntos, Jerome Numeran adunay 12 puntos ug sila si Briones Anton Villoria ug Dennis Concha nga midiga og 10 puntos matag usa.Ang pilderong Agilas gipangulohan ni Jonjon Gonzaga sa iyang 14 puntos.
Ang Game-1 sa Mindanao Finals himuon karong Nobiyembre 29 didto sa Xavier University Gym. (Yoyo R. Abayan)