Si Revo

Posibleng pipila pa lang ang nakaila kang Renemar 'Revo' David. Bag-ohay pa man gud siyang nakiglahugay sa mga prominenteng personahe sa natad sa billiard sport sama nila ni Efren 'Bata' Reyes, Francisco 'Django' Bustamante, Alex 'The Lion' Pagulayan, Antonio 'Gaga' Gabica, Warren Kiamco, Gande Valle, Lee Van Corteza, Marlon Manalo, Antonio Lining ug daghan pang uban.

Si Revo usa sa labing masaarong bilyarista sa atong nasud karong panahona. Sa edad nga 17, usa na siya ka medalist gumikan sa kalamposan nga iyang naani sa iyang pagsalmot sa  dakung torneyo nga gipahigayon sa gawas sa nasud niadtong miaging tuig. Nagtungha pa lang sa high school si Revo ug garbo siya sa iyang tulonghaan tungod sa achievement nga iyang naangkon.

Nakapadasig kang Revo ang pagpanghawod sa  batan-ong mga Pinoy cue artist mao nga nakahukom siyang ipadayon ang pagpalambo sa iyang hilig sa billiard sport. Kursonada siya maong wala siya'y kukahadlok nga nakiglahugay sa beteranong mga bilyarista maong kusog kaayong miuswag ang iyang dinulaan. Ang gikaintapang mga bilyarista sa atong nasud nga nakasaksi sa iyang pagdula nagtuo nga mahayag ang kaugmaon sa career ni Revo kay duna gayod kini ikabuga.

Si Revo nakaapil na sa usa ka dakung torneyo sa atong nasud, ang Pool Showdown. Bisan dili kaayo daku ang kalamposan nga naani ni Revo sa maong torneyo apan sa usa ka paagi o sa lain, iyang gipakita ang iyang katakus sa dulang bilyar. Iyang gipilde ang dekalibreng mga bilyarista sa atong nasud nga miapil sa maong torneyo hinungdan nga daghan ang nakadayeg sa iyang abilidad.

Ang pagsubang sa bituon ni Revo angay panaminan sa mga batan-on nga nagbaton og hilig pagpakyaw sa tako. Kun seryosohon nila ang pagpalambo sa ilang abilidad, daku ang kahigayonan nga ila sab maabot ang achievement nga naangkon ni Revo karon.  Determinasyon ug kadasig ray gikinahanglan.

* * *

MAGBILYAR TA TEXTMATE PORTION: 0928-2044921, 0910-3693245, 0921-7713510 ug 0928-7186480. Text na.

* * *

(Mga sugyot ug pakisayod? Text sa 0910-8105522)