17th Cebu City Olympics mosikad na

Kapin sa 5,000 ka  atleta ug opisyales  ang magdugok sa  opening ceremonies sa 17th Cebu City Olympics  nga  moulbo karong alas-7:00 sa buntag diha sa Cebu City Sports Center (CCSC).

Si Cebu City Mayor Tomas Osmeña gilaumang motambong ug mohatag sa iyang mensahe uban nilang Cong. Raul del Mar, Cong. Antonio Cuenco ug Augustus 'Joy' Young, ang educational consultant sa mayor.

Napulo ka mga distrito ang magsangka sa elementary division,  samtang 11 sa secondary division.

Napulo ka  mga institusyon ang mag-ilog sa titulo  sa collegiate division ning tuiga. Lakip niini ang University of San Carlos, Salazar Institute of Technology, University of Southern Philippines-Foundation, Southwestern University, Cebu Normal University, Velez College, Cebu Technical School, Sci-Tech/Cebu State College of Science and Technology, University of San Jose-Recoletos ug ang University of Cebu.

Ang kampiyon sa secondary division University of Cebu subli na usab nga manalipod sa ilang over-all title nga ilang gihuptan sukad pa sa 1990's. Si UC athletic director, Bernardo Ricablanca nagkanayon nga masaligon kaayo siya sa iyang mga atleta nga makadepensa gihapon sa ilang titulo karong tuiga.

Ang managsuong Bernardine ug Sally Mae Siso moduwa pa sa USC sa Unit VI sa lawn tennis events sa dili pa molarga paingon sa Malaysia uban ni Jacob Lagman sa St. Benedict Child Learning Foundation.

Sa collegiate division, dili makadepensa sa ilang korona ang Cebu Doctor's University gumikan kay dili  kini makaapil sa City Olympics kay nibalhin  na sila sa Mandaue Reclamation Area.

Dili sab makaapil ang Sacred Heart School-Jesuits  tungod kay nibalhin  sab sila sa Mandaue City. Pero ang Sacred Heart School-Hijas de Jesus makauban sa UC sa Unit 9 sa secondary division.

Ang Cebu City Olympics maoy division meet nga basihan sa pagpili sa mga atleta alang sa mga dagkung kompetisyon sama sa Central Visayas Regional Athletics Association (CVIRAA) ug Palarong Pambansa.

Ang Palarong Pambansa gold medallist sa gymnastics nga si Carmelli Garovillo maoy mangulo sa oath of sportsmanship samtang si Lindly Navaja, gold medal winner sa mga track events maoy moduslit sa Olympic urn. 

Usa mga highlights sa opening ceremonies mao ang pagpili og "Miss Cebu City Olympics 2007" diin si Bb. Pilipinas World 2006 Anna Maris Igpit maoy usa sa mga hurado.