ALA Boys nagpanikad na

Nagpanikad na ang mga bitoon  sa ALA Boxing Gym nga gipangulohan ni comebacking Rey 'Boom Boom' Bautista  sa gikahinaman nga "PAYBACK" promotion karong Disyembre 2 didto sa Araneta Coliseum.

Si Bautista (23-1, 19KOs) maoy mowadwad sa main event diin siya modepensa sa iyang WBO Intercontinental super bantamweight title batok sa dekalibreng Meksikano nga si Antonio 'Barrio' Meza  (23-2, 16KOs).

Mao kini ang labing unang pagkatkat ni Bautista ibabaw sa ring human sa makapabuak sa dughan niyang kapildihan pinaagi sa first round knockout ngadto ni WBO 122-pound titlist Daniel Ponce de Leon sa Mexico sa Boxing World Cup niadtong Agosto 12 didto sa Arco Arena sa Sacramento, California.

Lima pa ka laing garbo sa ALA Stable nga sila si AJ 'Bazooka'  Banal, Milan Melindo, Michael Domingo, Rocky Fuentes  ug Joseph Omanz ang mobanat sa maong multi-million card nga gipasiugdahan sa Third Force Promotions ni kanhi PBA commissioner Noli Eala ug ipasalida live sa ABC-5 sa bilyonaryong magpapatigayon nga si Tony Boy Cojuangco.

Si Banal (15-0-1, 12KO1s), manalipod sa labing unang higayon sa iyang WBO Youth super flyweight title batok sa Meksikanong KO artist nga si Jovanny 'Bambino' Soto (25-7-1, 20KOs).

Iyang nasakmit ang titulo human gipaluhod sud lamang sa usa ka hugna si Esau Gaona niadtong Septiyembre 30 didto sa Waterfront-Cebu City Hotel.

Sama ni Banal, si Melindo (13-0, 4KOs) modepensa sab sa labing unang higayon sa iyang WBO Asia-Pacific minimumweight title batok ni Jack Amisa (17-3, 13KOs) sa Indonesia.

Nasakmit ni Melindo ang WBO title human gipatikangkang si Thai Nuapayak Sakkririn sa ikaupat nga hugna niadtong Oktubre 6 didto sa dakbayan sa Cagayan de Oro.

Sa special attraction sa maong eksplosibong promosyon nga gi-presentar sab sa ALA Boxing Gym ni Antonio 'Bidoy' L. Aldeguer, si RP bantamweight champion Michael 'Bruce Lee' Domingo (33-14-2, 13KOs) makigharong batok ni Tanzanian Anthony Mathias (19-7-1, 9KOs).

Si RP flyweight champion Fuentes (20-5-2, 12KOs) makigtigi batok ni PBF 112-pound champion Richie Mepranum (9-2-1, 2KOs) sa Maasim, Sarangani Province, samtang si Joseph Omanz (8-0, 4KOs) makigtakos batok sa tagilungsod ra sab niyang Sugbuanon nga si Albert Cesa sa Omega Stable.

Sa lain pang mga kumbati, masaksihan si Jason Pagara sa Eronico Stable sa Cagayan de Oro nga makighamag ni Anton Olarte sa Willy Neri Stable sa Davao City ug ang way pildeng si Bai Elorde sa Elorde Stable nga makigpinaksitay batok sa Sugbuanong si Marron Sanchez sa Omega Stable.