SHS-J FC mipahiluna sa ikaduha sa Alaska Cup

Ang Sacred Heart School-Jesuit Football Club (SHS-J FC) miangkon sa ikaduhang dapit sa Boys 10 age group sa Alaska Cup Football Festival niadtong miaging adlaw didto sa  Alabang Country Club sa Muntinlupa City.

Ang SHS-J FC napilde ngadto sa Tamasak Football Club pinaagi sa penalty shootout, 1-2 sa championship game.

Natapos ang regulasyon sa iskor nga 1-1  uban ni  Gani Fernandez nga mi-iskor og unang goal sa duwa alang sa SHS-J FC sa first half.

Apan ang Tamasak nakabawi sa endgame aron pagtabla nga may tres minutos pa ang nahabilin sa maong duwa.

Gumikan kay naluya na ang duha ka teams ug walay goal nga nahimo, ang championship game naresolbar pinaagi sa  penalty shootout.

Gikalipay sa SHS-J  FC ang runner-up finish gumikan kay mao pa man kini ang una nilang pag-apil ning tinuig nga  football festival nga gisalmotan sa mga ngilngig nga teams lukop nasud.

Ang SHS-J  FC nidominar sa ilang grupo sa elimination round pinaagi sa pagharos sa mga kaatbang.

Ilang gipukan ang Brent, 4-2, dayon gisunod ang Brightwood, 8-0. Ila usab nga gisirohan ang Las Piñas, 8-0, gipilde sab nila ang Makati Football Club, 5-1 ug ang katapusan nilang biktima mao ang Faith Academy, 4-3.

Sa quarterfinal round, ang SHS-J  FC mimakmak sa Don Bosco Pampanga, 5-1. Ilang giharong ang Cebu International School  ug gipilde sa iskor nga 3-1 sa semifinals wala pa nila makontra ang Tamasak.