Ilusad karong 9:30 sa buntag ang ika-17 nga Cebu City Olympics diha sa Chowking, Sto. Niño branch.
Ang maong kalihokan pagatambongan mismo ni Mayor Tomas R. Osmeña sa dakbayan sa Sugbu ingon man usab ni bise-mayor Michael L. Rama ug ni konsehal Gerardo A. Carillo, ang tsirman sa Cebu City Olympics committee.
Ang nahisgotang mga opisyales mohatag sa ilang mensahe ingon man si Dr. Enrique P. Garcia, ang director sa Commission on Higher Education (CHED) dinhi sa Rehiyon 7.
Aduna dayo'y ipahigayon nga open forum ngadto sa mga mitambong ilabi na gayud ang mga sakop sa local media.
I-presentar ni Mrs. Nenita E. Pardenilla, ang coordinator sa Physical Education in School Sports (PESS) Cebu City division ang mga tournament managers sa nagkalainlaing mga sports events.
Si Dr. Danilo Villadolid, ang consultant sa technical affairs mohisgot sa kaagi sa Cebu City Olympics human sa welcome address ni Mrs. Teresita L. Ga, ang ES Guidance 1 samtang si Dr. Ellen Salgado, ang ES 1 Hekasi maoy mohatag sa opening prayer.