Pacquiao-Marquez rematch gihikay na

Gisugdan na ang negosasyon kalabot sa gikahinaman nga "rematch" tali nilang Manny Pacquiao ug Juan Manuel Marquez nga tentatibong gitakda sa Marso 15 sunod tuig sa wala pa hisayring binyu.

Mao kini ang gipahibalo ni Golden Boy Promotions CEO Richard Schaffer kagahapon.

“Both (Bob) Arum and I, we already met and we talked about this fight, in case Juan Manuel Marquez did win. We have the date reserved, which is March 15th, of next year,”  matud pa ni Schaffer atol sa post-fight press conference sa away nilang Marquez ug Rocky Juarez sa miaging adlaw didto sa Desert Diamond Casino sa Tuczon, Arizona.

“I will be with Bob next week in New York for the Mosley-Cotto fight and I will have further discussions and negotiations with him,” dugang pa ni Schaffer sigun sa taho sa fightnews.com.

Sa iyang bahin, si GBP president Oscar de la Hoya nagtuo nga ang Pacquiao-Marquez II maoy gihandum sa mga mahiligon og  boksing sa tibuok kalibutan. Gani iya pang gihagit si  Pacman nga aron siya makapamatuod nga  hawod sa super featherweight division, mag-agi una siya sa mga kamot ni Marquez.

“If you want to be called the best at 130 pounds, you have to go through Marquez,” matud pa ni De la Hoya.

Mismo si Marquez mideklara nga gusto niyang sangkaon sunod si Pacman ug gihagit niini ang Pinoy nga pamatud-an ang pamahayag niini nga siya usa ka “Mexican killer.”

“I want a fight with Manny Pacquiao,” pamahayag pang Marquez human gipukan niini si Juarez pinaagi sa unanimous decision aron pagdepensa sa iyang  WBC super featherweight title sa labing unang higayon.

Sa una nilang engkuwentro niadtong Mayo 8, 2004 didto sa MGM Grand sa Las Vegas, Nevada,  si Pacquiao mipalukapa ni Marquez tulo ka higayon sa unang hugna, apan milagrong nakabangon kini dayon na ngadto sa pagpuwersa og kontrobersiyal nga majority draw sa ilang IBF/WBA featherweight unification bout.